პუტინმა გუნბას ოკუპირებული აფხაზეთის ე.წ. პრეზიდენტად არჩევა მიულოცა

„მიიღეთ გულწრფელი მილოცვა აფხაზეთის რესპუბლიკის პრეზიდენტად თქვენი არჩევის გამო“, - ნათქვამია კრემლის პრეს-სამსახურის მიერ გამოქვეყნებულ განცხადებაში.

როგორც პუტინი ამბობს, არჩევნები „ხალხის ნების თავისუფლი გამოხატვის პირობებში“ ჩატარდა და გუნბას გამარჯვებამ დაადასტურა „აფხაზეთის მოქალაქეების“ მხარდაჭერა მისი ხაზის მიმართ - უზრუნველყოს შიდაპოლიტიკური სტაბილურობა და „ქვეყნის პროგრესირებადი სოციალურ-ეკონომიკური განვითარება“.

„მაქვს იმედი, რომ მეგობრული, მოკავშირული რუსულ-აფხაზური ურთიერთობა შემდგომშიც გაძლიერდება ჩვენი მოძმე ერების საკეთილდღეოდ“,  - აცხადებს პუტინი.

რუსეთის მიერ ოკუპირებულ აფხაზეთში ე.წ. პრეზიდენტის ვადამდელი არჩევნების მეორე ტური 1-ელ მარტს გაიმართა. გამოცხადებული შედეგების მიხედვით, ბადრა გუნბამ, რომელიც კრემლის მიერ მხარდაჭერილი კანდიდატი იყო, ხმების თითქმის 55% მიიღო, ხოლო მისმა კონკურენტმა, ე.წ. ოპოზიციის ლიდერმა, ადგურ არძინბამ -  41.5%.

ე.წ. არჩევნებს შერიგებისა და თანასწორობის საკითხებში საქართველოს სახელმწიფო მინიტრის აპარატი გამოეხმაურა. განცხადების მიხედვით, ოკუპაციის ფონზე და იმ პირობებში, როდესაც იძულებით გადაადგილებულ პირებსა და ლტოლვილებს ამ დრომდე არ ეძლევათ საკუთარ სახლებში დაბრუნების შესაძლებლობა, ასევე უხეშად და სისტემატურად ირღვევა ადგილობრივი მკვიდრი მოსახლეობის ძირითადი უფლებები და თავისუფლებები, ე.წ. არჩევნები ვერ გამოხატავს ხალხის ნებას.