როცა შეხვედრებისთვის მივემგზავრებით EU-ის წევრ ქვეყნებში, ვიღებთ ვიზას – ბოჭორიშვილი

„ჩვენ ვიზისთვის მივმართავთ ევროკავშირის შესაბამისი ქვეყნის საელჩოებს, როდესაც კონკრეტული შეხვედრებისთვის მივემგზავრებით ევროკავშირის წევრ ქვეყნებში. რა თქმა უნდა, ჩვენ ვიღებთ იმ ქვეყნის ვიზას და ეს დიდ პრობლემას არ უქმნის საქართველოს მოსახლეობას“, – განაცხადა ბოჭორიშვილმა საზოგადოებრივი მაუწყებლის ეთერში.

„ქართული ოცნების“ საგარეო საქმეთა მინისტრმა იმედი გამოთქვა, რომ ვიზალიბერალიზაცია არ გაუქმდება და ევროკავშირი „საქართველოს მოქალაქეების დასჯას გადაიფიქრებს“.

„თუკი ეს გადაწყვეტილება იქნება მიღებული, ეს იქნება უდიდესი სტრატეგიული შეცდომა ევროკავშირის მხრიდან, ევროკავშირის საგარეო ქმედებათა სამსახურის მხრიდან“, – აღნიშნა მაკა ბოჭორიშვილმა.

ევროპარლამენტმა 7 ოქტომბერს უვიზო რეჟიმის შეჩერების მექანიზმის გამარტივებას დაუჭირა მხარი. მექანიზმი ევროკავშირს საშუალებას აძლევს, კონკრეტული ქვეყნისთვის სავიზო მოთხოვნები აღადგინოს - თავდაპირველად დროებით, შემდეგ კი მუდმივად, თუ პრობლემები არ აღმოიფხვრება. უვიზო რეჟიმის გაუქმება მოხდება მაშინაც, როდესაც ევროკავშირის ურთიერთობები ქვეყანასთან გაუარესდება, მაგალითად, ადამიანის უფლებების დარღვევის შემთხვევაში.