რუსი მოციგურავეები დევისი და სმოლკინი სავარაუდოდ საქართველოს დროშით იასპარეზებენ

„გადასვლასთან დაკავშირებით დევისისა და სმოლკინისგან განაცხადი არ მიგვიღია, მაგრამ 22 მაისს საქართველოდან შემოვიდა რელიზი თხოვნით, რომ გადასვლის შესაძლებლობა მიგვეცა.

ჩვენ ეს საკითხი განვიხილეთ, 25 მაისს აღმასკომის ბიურომ მათი გაშვების გადაწყვეტილება მიიღო. ოლიმპიური თამაშების შემდეგ, წელიწადნახევრის განმავლობაში მათ არცერთ შეჯიბრებაში არ მიუღიათ მონაწილეობა, მათზე ფული არ დახარჯულა. რუსეთში არ ჩამოდიოდნენ, ამიტომ გავუშვით“, - განაცხადა ჩაიკოვსკაიამ.

20 წლის დიანა დევისი ფიგურულ ციგურაობაში რუსეთის დამსახურებული მწვრთნელის, წარმოშობით ქართველი ეთერ თუთბერიძის ქალიშვილია. მას აშშ-ის მოქალაქეობა აქვს, ხოლო მისი პარტნიორი, 23 წლის გლებ სმოლკინი რუსი მსახიობის, ბორის სმოლკინის შვილია. წყვილი 2021-22 წლის რუსეთის ჩემპიონატის ვერცხლის პრიზიორია. 2022 წლის პეკინის ზამთრის ოლიმპიადაზე მათ რუსეთის დროშით იასპარეზეს და მე-14 ადგილი დაიკავეს. ამჟამად ისინი შეერთებული შტატებში ვარჯიშობენ.

საქართველოს ნაკრებში გაწევრიანებით დევისის და სმოლკინის წყვილს საერთაშორისო შეჯიბრებებზე გამოსვლის შანსი გაუჩნდებათ.

2022 წლის 1-ელ მარტს, უკრაინაში რუსეთის შეჭრისა და ომის დაწყების შემდეგ, მოციგურავეთა საერთაშორისო კავშირმა (ISU), ისევე როგორც სხვა საერთაშორისო სპორტულმა ორგანიზაციებმა, რუს სპორტსმენებს საერთაშორისო შეჯიბრებებში მონაწილეობა აუკრძალა. ბევრმა სპორტსმენმა რუსეთის მოქალაქეობაზე უარი თქვა და სხვა ქვეყნების სახელით გააგრძელა ასპარეზობა.

9-11 ივნისს ISU საბჭოს სხდომა გაიმართება, სადაც რუსეთის და ბელარუსის სპორტსმენების დაშვების საკითხს განიხილავენ. უკრაინის ფიგურული ციგურაობის ფედერაციამ ISU-ს მოუწოდა, რუს მოციგურავეებთან დაკავშირებული აკრძალვა ომის დასრულებამდე ძალაში დატოვოს.

საქართველოს ფიგურული ციგურაობის ფედერაციაში ამ საკითხზე კომენტარს არ აკეთებენ. იუსტიციის მინისტრმა რატი ბრეგაძემ ჟურნალისტის შეკითხვის საპასუხოდ განაცხადა, რომ საქართველოს მოქალაქეობის მინიჭებაზე რუსი სპორტსმენების მიმართვის შემთხვევაში, სამინისტრო „შესაბამის საორგანიზაციო სამუშაოებს ჩაატარებს“, საბოლოო გადაწყვეტილების მიღება კი პრეზიდენტის პრეროგატივაა.