საბერიოში ტრაგიკულად დაღუპული 5 ბავშვის ოჯახს „ოცნების“ მთავრობა 10 000 ლარს გადასცემს

„შერიგებისა და სამოქალაქო თანასწორობის საკითხებში საქართველოს სახელმწიფო მინისტრის აპარატმა უზრუნველყოს ვიტალი ჭოლარიასთვის 10 000 (ათი ათასი) ლარის ოდენობის დახმარების გაცემა“, - ვკითხულობთ 8 იანვრით დათარიღებულ განკარგულებაში.

ოკუპირებულ საბერიოში, ხის სახლში გაჩენილმა ხანძარმა ხუთი არასრულწლოვანი დის - ანა-მარიას, ელენეს, ემილიას, სოფიოს და ნია ჭოლარიების სიცოცხლე შეიწირა. ტრაგედია 5 იანვრის დილას იმ დროს მოხდა, როდესაც ბავშვებს ეძინათ. დაღუპული დებიდან ყველაზე უმცროსი 8 თვის იყო.

ჭოლორაიების ოჯახი ზუგდიდის მუნიციპალიტეტის სოფელ ახალკახათში, დევნილთა დასახლებაში ცხოვრობდა. ბავშვები ბებიასთან საახალწლო არდადეგებზე იმყოფებოდნენ. ბავშვების დედა ზუდგიდის საავადმყოფოში იწვა და იმ დღეს, როდესაც ტრაგედია დატრიალდა, მამა მის მოსანახულებლად იყო წასული.

ხანძარს მხოლოდ ბებია გადაურჩა. ის სამკურნალოდ ქუთაისის რეფერალურ ჰოსპიტალში გადმოიყვანეს.

გავრცელებული ინფორმაციით, ღუმელის ანთების დროს ბებიას ნავთი ბენზინში აერია, რამაც ხანძარი გამოიწვია. ხის სახლი რამდენიმე წუთში მთლიანად ჩაიწვა.

ოკუპირებულ აფხაზეთში ელექტროენერგიის მიწოდებასთან დაკავშირებული პრობლემების გამო, ბევრი ადგილობრივი იძულებულია, შეშის ღუმელი და ნავთქურა გამოიყენოს.

მომხდარის გამო „ქართული ოცნების“ მთავრობამ 9 იანვარი საქართველოში გლოვის დღედ გამოაცხადა.