საქართველო ვერ შეუერთდება ევროკავშირს დღევანდელი კურსით - ცაჰკნა

„გაფართოება ევროკავშირის ხელთ არსებული ერთ-ერთი ყველაზე მძლავრი ინსტრუმენტია, რაც სარგებელს მოუტანს როგორც წევრ ქვეყნებს, ისე მთლიანად ევროპას. ამიტომ,

ესტონეთის პოზიცია მტკიცეა - გაფართოება უნდა გაგრძელდეს და ეს უნდა იყოს პირობებით და კანდიდატი ქვეყნების რეალურ პროგრესზე დაფუძნებული.

ესტონეთისთვის გადამწყვეტი ფაქტორებია კანდიდატი ქვეყნის სწორი კურსი დემოკრატიისა და კანონის უზენაესობის საკითხებში, ისევე როგორც საერთო პოზიციები საგარეო და უსაფრთხოების პოლიტიკაში“, - განაცხადა ცაჰკნამ.

მისივე თქმით, უკრაინისა და მოლდოვას პროგრესი გაწევრიანების მოთხოვნების შესრულებაში შთამბეჭდავია, რის გამოც ესტონეთს სურს, რომ მოლაპარაკებების პირველი რაუნდი - კანონის უზენაესობისა და დემოკრატიის თემებზე - მიმდინარე წლის მარტში გაიხსნას.

„მე ასევე მინდა შევაქო სომხეთი, რადგან ესტონეთი ძალიან აფასებს იქ გატარებულ რეფორმებს, ასევე სახელმწიფოს მიერ ევროკავშირთან დაახლოებისკენ გადადგმულ ნაბიჯებს. ჩვენ მხარს ვუჭერთ ყველა ძალისხმევას სამხრეთ კავკასიაში სტაბილურობის უზრუნველსაყოფად და მიგვაჩნია, რომ განსაკუთრებით მნიშვნელოვანია სომხეთსა და აზერბაიჯანს შორის სამშვიდობო ხელშეკრულების რაც შეიძლება მალე დადება.

სამწუხაროდ, ევროკავშირის გაფართოებაც შეიძლება შეტრიალდეს, რასაც მოწმობს საქართველოში განვითარებული მოვლენები, როდესაც მმართველი პარტია ქვეყანას უფრო აშორებს როგორც დემოკრატიას, ასევე დასავლეთზე ორიენტირებულ საგარეო პოლიტიკას.

ნათელია, რომ საქართველო ვერ შეუერთდება ევროკავშირს დღევანდელი კურსით და რომ საქართველოში დე ფაქტო ხელისუფლებაში მყოფ ადამიანებს არ აქვთ დემოკრატიული ლეგიტიმაცია.

ჩვენ ვთქვით, რომ ახალი არჩევნების ჩატარება ამ კრიზისიდან გამოსვლის და ნდობის აღდგენის გზაა. თუ ხელისუფლება გააგრძელებს ძალადობის გამოყენებას, ჩვენ მზად ვართ გავაგრძელოთ სანქციების გამკაცრება, მათ შორის უვიზო მიმოსვლის გაუქმება“, - თქვა ესტონეთის საგარეო საქმეთა მინისტრმა.

28 ნოემბერს, საპარლამენტო არჩევნებიდან ერთი თვის თავზე, არალეგიტიმურმა პრემიერ-მინისტრმა, ირაკლი კობახიძემ განაცხადა, რომ „ქართული ოცნება“ 2028 წლის ბოლომდე დღის წესრიგში არ დააყენებს საქართველოს ევროკავშირში გაწევრიანებაზე მოლაპარაკებების გახსნის საკითხს. პროტესტი, რომელიც ამ განცხადებას მოჰყვა, უკვე თითქმის სამი თვეა უწყვეტად გრძელდება.