საქართველოში არჩევნების გამო ცხინვალის საოკუპაციო რეჟიმი ოქტომბერში ე.წ. საზღვარს დაკეტავს

„სამხრეთ ოსეთის მოსახლეობის უსაფრთხოების უზრუნველსაყოფად და საქართველოს პროდასავლური და ნაციონალისტური რადიკალური ძალების მხრიდან შესაძლო პროვოკაციების გამორიცხვის მიზნით, მიღებულ იქნა გადაწყვეტილება ოქტომბერში შეჩერდეს სახელმწიფო საზღვრის გამშვები პუნქტების „რაზდახანის“ და „პერეუს“ მუშაობა გამარტივებული წესით“, - ეს გადაწყვეტილება დღეს ე.წ. რესპუბლიკის უშიშროების საბჭოს სხდომაზე მიიღეს.

სხდომის თავმჯდომარემ, დე ფაქტო პრეზიდენტმა ალან გაგლოევმა თქვა, რომ საპარლამენტო არჩევნების წინ საქართველოში სიტუაცია უარესდება და რთულდება. მისი განცხადებით, დასავლეთის ქვეყნების დაზვერვის სამსახურები, ისევე როგორც ამ ქვეყნების საელჩოები, ღიად ახორციელებენ სიტუაციის დესტაბილიზაციის მცდელობებს.

„იმის გათვალისწინებით, რომ ყოველი თვის 20-დან 30 რიცხვამდე პერიოდულად ვხსნით სახელმწიფო საზღვარს ჰუმანიტარული მიზნით და ჩვენი მოქალაქეები გადიან საქართველოს ტერიტორიაზე, აუცილებელია ზომების მიღება მათი და რესპუბლიკის უსაფრთხოების უზრუნველსაყოფად“, - აღნიშნა გაგლოევმა.

გადაწყვეტილების აღსრულებაზე კონტროლი ე.წ. სამხრეთ ოსეთის უშიშროების საბჭოს მდივანს, ანატოლი პლიევს დაევალა.