ბანანის კონტეინერიდან ამოვიღეთ 52 კგ კოკაინი, რომელიც ევროპაში გადაჰქონდათ - შსს

შსს-ში განაცხადეს, რომ გაანეიტრალეს ერთ-ერთი მსხვილი ინტერნეტ ნარკოსარეალიზაციო მაღაზია, რომელიც ე.წ. შავი ბაზრის 50%-ზე მეტს ამარაგებდა.

„მაღაზიას მართავდა და ასევე, დადების მეთოდით განსაკუთრებით დიდი ოდენობით ნარკოტიკული საშუალების რეალიზაციას ახდენდა ჩვენ მიერ დაკავებული, 1963 წელს დაბადებული საქართველოს მოქალაქე, რომლის პირადი და საცხოვრებელი ბინის ჩხრეკისას, მის მიერ მითითებული ადგილებიდან ნივთმტკიცებად ამოვიღეთ 4 კილოგრამამდე ნარკოტიკული საშუალება „კოკაინი“, 27 ათასი ცალი ნარკოტიკული საშუალება „ექსტაზის“ აბები და 10 კილოგრამი ნარკოტიკული საშუალება „მდმა“, - თქვა კუპატაძემ.

შსს-ს ინფორმაციით, ბოლო პერიოდში, მთელი ქვეყნის მასშტაბით ნარკოდანაშაულის ბრალდებით 77 პირი დააკავეს, რომელთაგან 23-ს ნარკოტიკების რეალიზაციას ედავებიან. დაკავებულები არიან საქართველოს, ირანის, თურქეთის, რუსეთის, ინდოეთის და ნიგერიის მოქალაქეები.

გამოძიება სისხლის სამართლის კოდექსის 260-ე და 262-ე მუხლებით მიმდინარეობს, რაც ნარკოტიკული საშუალების უკანონო დამზადებას, წარმოებას, შეძენას, შენახვას, გადაზიდვას, გადაგზავნას ან გასაღებას, ასევე, საქართველოში უკანონოდ შემოტანას, საქართველოდან უკანონოდ გატანას ან ტრანზიტით საერთაშორისო გადაზიდვას გულისხმობს. დანაშაულები 20 წლამდე ან უვადო თავისუფლების აღკვეთით ისჯება.