სოხუმის ე.წ. საერთაშორისო აეროპორტმა მოსკოვის ვნუკოვოს აეროპორტიდან პირველი საცდელი რეისი მიიღო. ფრენა შეასრულა რუსეთის თათრეთის რესპუბლიკის ავიაკომპანიამ, UVT Aero-მ, რომელიც ევროკომისიის მიერ „შავი სიაშია“ შეყვანილი და ევროკავშირის სივრცეში ფრენები აკრძალული აქვს. 2023 წლის ივლისში UVT Aero-ს საქართველოში ყაზახეთის საფეხბურთო კლუბ „აქტობეს“ ფეხბურთელები უნდა ჩამოეყვანა, თუმცა სანქციების გამო, საქართველოს სამოქალაქო ავიაციის სააგენტომ ფრენის განხორციელების ნებართვა არ მისცა.
ახალი ამბები
მკითხველის რჩეული
- 1 ვინ არის ბათუმის საქალაქო სასამართლოს მოსამართლე ნინო სახელაშვილი
- 2 „შერატონის“ მენეჯერის თქმით, ქორიძესა და გახარიაზე თავდასხმის ჩანაწერები შსს-ს ჯერ არ ამოუღია
- 3 მოსკოვი მზადაა, რუსეთ-საქართველოს „ურთიერთობების ნორმალიზაცია“ გააგრძელოს
- 4 ბაკურციხე-თბილისის გზაზე ავტოავარიის შედეგად ოთხი ადამიანი დაიღუპა
- 5 „ბო*იშვილი ვიყო, სისხლით დავიჭერ“ - ბათუმის პოლიციის უფროსი ირაკლი დგებუაძე მზია ამაღლობელზე
- 6 საია: დაკავების შემდეგ ირაკლი დგებუაძემ მზია ამაღლობელს სახეში შეაფურთხა
„დღეს ძალიან მნიშვნელოვანი მოვლენა მოხდა. 30 წელზე მეტი ხნის შემდეგ სოხუმის აეროპორტმა მიიღო თვითმფრინავი, რომელსაც ასე დიდხანს ველოდით“, - განაცხადა ოკუპირებული აფხაზეთის დე ფაქტო რესპუბლიკის ე.წ. პრეზიდენტის მოვალეობის შემსრულებელმა და პრეზიდენტობის კანდიდატმა, ბადრა გუნბამ. ბორტზე მყოფ 21 ადამიანს შორის აფხაზი სტუდენტებიც იყვნენ.
გუნბას თქმით, ტურისტული სეზონის დაწყებასთან ერთად რუსეთის ქალაქებში რეგულარულ ფრენების შესრულებას ელიან. „დარწმუნებული ვარ, რუსეთში ფრენების გეოგრაფია გაფართოვდება“, - აღნიშნა მან.
საცდელი ფრენის შესრულებას წინ უძღოდა რუსეთის პრეზიდენტის ადმინისტრაციის ხელმძღვანელის პირველი მოადგილის, სერგეი კირიენკოს ვიზიტი ოკუპირებულ აფხაზეთში. მისი განცხადებით, „პრინციპულად მნიშვნელოვანია“, აეროპორტის რეკონსტრუქცია პირველ მაისამდე დასრულდეს.
„ვლადისლავ არძინბას სახელობის სოხუმის საერთაშორისო აეროპორტის“ აღდგენის შესახებ ე.წ. შეთანხმება რუსეთისა და დე ფაქტო აფხაზეთის მთავრობებს შორის 2023 წლის ივნისში გაფორმდა. აეროპორტს შპს „ინფრასტრუქტურული განვითარება“ აღადგენს, რომელიც რუსეთის შინაგან საქმეთა ყოფილი მინისტრის და ამჟამად უშიშროების საბჭოს მდივნის პირველი მოადგილის, რაშიდ ნურგალიევის შვილს, რაშიდ ნურგალიევს (უმცროსი) ეკუთვნის.
დე ფაქტო აფხაზეთის მთავრობამ რუს ინვესტორს აეროპორტი 49 წლით, სარგებლობის უფლებით გადასცა. აქედან 25 წელი „ინფრასტრუქტურული განვითარება“ განსაკუთრებული საგადასახადო რეჯიმით ისარგებლებს, გარკვეული შეღავათები კი ხელშეკრულების მთელი ვადის განმავლობაში გაგრძელდება. ხელშეკრულების მიხედვით, აეროპორტი ინარჩუნებს ორმაგი დანიშნულების სტატუსს.
სოხუმის აეროპორტი 1960-იან წლებში გაიხსნა და სოხუმიდან 18 კილომეტრში, სოფელ ბაბუშარაში მდებარეობს. ის 1993 წელს, აფხაზეთში მიმდინარე კონფლიქტის შედეგად დაიხურა.
