სოფლის ნობათის რძეში ჯანმრთელობისთვის სახიფათო ნივთიერება გამოვლინდა

ლაბორატორიული კვლევის შედეგად „სოფლის ნობათის“ პროდუქციაში, მათ შორის საბავშვო რძის ნიმუშებში, ადამიანის ჯანმრთელობისთვის საფრთხის შემცველი ტოქსინი - აფლატოქსინ M1 გამოვლინდა. სურსათის ეროვნული სააგენტო მომხმარებლებს მოუწოდებს, აღნიშნული რძე არ გამოიყენონ.

ახალი ამბები

მკითხველის რჩეული

სააგენტო განმარტავს, რომ აფლატოქსინი წარმოიქმნება ობის სოკოებისაგან. აფლატოქსინ B1-ით დაბინძურებული საკვები ხვდება ცხოველის ორგანიზმში, საიდანაც გადადის რძეში და გარდაიქმნება M1 აფლატოქსინად, რაც საფრთხეს უქმნის ადამიანის ჯანმრთელობას.

სურსათის ეროვნული სააგენტოს მიერ დღეს, 3 აპრილს გამოქვეყნებული განცხადების მიხედვით, შპს „ვიმ-ბილ-დან საქართველოში“ (ს/კ 204546553 („სოფლის ნობათი“) სახელმწიფო კონტროლი 28 მარტს განხორციელდა.

„ინსპექტირების შედეგად საწარმოში კრიტიკული შეუსაბამობა არ გამოვლენილა, თუმცა, დაფიქსირდა სურსათის შესახებ ინფორმაციის მიწოდების წესის დარღვევა, რის გამოც ბიზნესოპერატორი დაჯარიმდა სურსათის/ცხოველის საკვების უვნებლობის, ვეტერინარიისა და მცენარეთა დაცვის კოდექსის შესაბამისად.

 გარდა ამისა, შპს „ვიმ-ბილ-დან საქართველოს“ დაევალა აზერბაიჯანში წარმოებული რძის 5 ნიმუშის აღება (რომლიდანაც ერთი არის ბავშვთა კვებისთვის განკუთვნილი) და აფლატოქსინ M1-ზე გამოკვლევა. ასევე არასწორად ეტიკეტირებული სურსათის ბაზრიდან გამოთხოვა.

სააგენტოს ზედამხედველობით აღებული ნიმუშები გაიგზავნა აკრედიტებულ ლაბორატორიაში. ლაბორატორიული კვლევის შედეგად აფლატოქსინ M1-ის გადაჭარბებული ოდენობა დაფიქსირდა ხუთ ნიმუშში. კერძოდ:

  • სასმელი რძე საბავშვო, ულტრაპასტერიზებული - 2.5% ცხიმიანობით - დამზადების თარიღი: 04.02.2025, ვარგისიანობის ვადა: 03.08.2025;
  • სასმელი რძე რჩეული ულტრაპასტერიზებული, 1.5% ცხიმიანობით - დამზადების თარიღი: 12.02.2025, ვარგისიანობის ვადა: 11.08.2025;
  • სასმელი რძე რჩეული ულტრაპასტერიზებული, 1.5% ცხიმიანობით - დამზადების თარიღი: 10.02.2025, ვარგისიანობის ვადა: 09.08.2025;
  • სასმელი რძე რჩეული ულტრაპასტერიზებული, 2.5% ცხიმიანობით - დამზადების თარიღი: 09.02.2025, ვარგისიანობის ვადა: 08.08.2025;
  • ⁠სასმელი რძე რჩეული ულტრაპასტერიზებული, 3,2% ცხიმიანობით - დამზადების თარიღი: 02.02.2025, ვარგისიანობის ვადა: 01.08.2025.

შპს „ვიმ-ბილ-დან საქართველოს“ დაევალა დასახელებული სურსათის პარტიების სარეალიზაციო ქსელიდან ამოღება/გამოთხოვა. სურსათის ეროვნული სააგენტო მოუწოდებს მომხმარებელს, არ გამოიყენოს აღნიშნული რძე“, - ნათქვამია სააგენტოს განცხადებაში.

სურსათის ეროვნული სააგენტოს მიერ შპს „ვიმ-ბილ-დან საქართველოში“ („სოფლის ნობათი“) ჩატარებული ინსპექტირების შედეგების გამოქვეყნებას წინ უძღოდა „რადიო თავისუფლების“ ჟურნალისტური გამოძიება, საიდანაც გაირკვა, რომ რძის მწარმოებელი კომპანია „ყვარლის ბაგა“, რომელიც „ქართული ოცნების“ მხარდამჭერ ბიზნესმენს, ლაშა პაპაშვილს ეკუთვნის, 2018-2020 წლებში ძროხებს ქათმის სკინტლით კვებავდა. სწორედ „ყვარლის ბაგისგან“ ყიდულობენ რძეს „სოფლის ნობათი“, „სანტე“ და „აგროჰაბი“, ასევე, თავად „ყვარლის ბაგის“ შვილობილი კომპანია „რძის ლაბორატორია“.

საქართველოს ამბები
საქართველოს ამბები
დამოუკიდებელი, საზოგადოებრივ-პოლიტიკური ონლაინგამოცემა. ვებგვერდს მართავს შპს საქართველოს ამბები.