სპორტული კომენტატორის, სანდრო ცნობილაძის სახლში ჩხრეკა ჩატარდა

„ჩხრეკაზე შემოვიდნენ დილას და მიმდინარეობს საგამოძიებო მოქმედებები. აქ არის ადვოკატიც. არ ვიცი, რას ეძებენ. ამოიღეს ტელეფონები, ლეპტოპები და კომპიუტერი“, - უთხრა სანდრო ცნობილაძემ მისი სახლის კართან მისულ ჟურნალისტებს.

შეკითხვაზე, რას უკავშირებს ჩხრეკას, განაცხადა: „იმას, რომ სულ აქციებზე ვარ“.

სპეციალური საგამოძიებო სამსახურის წარმომადგენლის თქმით, საგამოძიებო მოქმედება სასამართლოს განჩინების საფუძველზე, დაზარალებულის მითითებით, „პირადი ცხოვრების ამსახველი ინტიმური შინაარსის ფოტოებთან დაკავშირებით“ ჩაატარეს და კომპიუტერული ტექნიკა ამოიღეს.

„დაზარალებული ქალის მომართვის საფუძველზე მიმდინარეობს გამოძიება პირადი ცხოვრების ამსახველი ინტიმური შინაარსის ფოტოების უკანონოდ მიოპოვების ფაქტთან დაკავშირებით. დაზარალებული მიუთითებდა პიროვნებაზე, ვისთანაც ჩავატარეთ პირადი ჩხრეკა. ასევე, Meta-დან მოსული ინფორმაცია ემთხვევა იმ მისამართს, საიდანაც ყალბი ექაუნთის გამოყენებით პიროვნება უკანონოდ მოიპოვებდა ინტიმური შინაარსის ფოტომასალას. ბრალდებაზე არ არის საუბარი [...] სხვა დეტალებს ამ ეტაპზე ვერ გეტყვით. მიმდინარეობს გამოძიება“, - აღნიშნა გამომძიებელმა ვასილ კაკაშვილმა. 

საგამოძიებო უწყებებმა ბოლო თითქმის სამი თვის განმავლობაში ჩხრეკა პროევროპული აქციების არაერთი აქტიური მონაწილის ბინაში ჩაატარეს, რაც მათი დაშინების მცდელობად შეფასდა.