სახელმწიფო უსაფრთხოების ყოფილი უფროსი გრიგოლ ლილუაშვილი აღარც რეგიონული განვითარების მინისტრი იქნება. „ქართული ოცნების“ პრემიერ-მინისტრმა, ირაკლი კობახიძემ ის ამ თანამდებობაზე ორი დღის წინ წარადგინა, თუმცა, დღეს გამართულ ბრიფინგზე განაცხადა, რომ ახლად შექმნილ სამინისტროს კახაბერ გულედანი უხელმძღვანელებს.
ახალი ამბები
მკითხველის რჩეული
- 1 კობახიძე მაღაროელების პროტესტზე: რთულია კერძო ბიზნესს ხელფასების გადახდა მოსთხოვო
- 2 ენმ: გენერლები გოგავა და ყურაშვილი რუსულ კომისიაზე პარტიული აფილიაციის გარეშე წარდგებიან
- 3 რატომ შეხვდა აშშ-ის ელჩი „ქართული ოცნების“ საგარეო საქმეთა მინისტრს
- 4 კობახიძე: აქედანვე შემიძლია გითხრათ, რომ თვითმმართველობის არჩევნებს მოვიგებთ
- 5 საიამ არჩევნებზე ფარულობის მასობრივ დარღვევაზე სტრასბურგის სასამართლოს მიმართა
- 6 გადაალაგეს, სუს-იც თან გაატანეს არჩევნების გაყალბების ფუნქციით - მეზვრიშვილი ლილუაშვილზე
კობახიძის განმარტებით, ასეთი გადაწყვეტილების მიზეზი ლილუაშვილის „განსხვავებული მიდგომები“ გახდა.
„რამდენიმე დღის წინ, საპარლამენტო უმრავლესობასთან კონსულტაციების საფუძველზე, მივიღეთ გადაწყვეტილება საქართველოს რეგიონული განვითარების სამინისტროს შექმნის შესახებ. გარდა ამისა, განვაცხადეთ, რომ აღნიშნულ თანამდებობას ბატონი გრიგოლ ლილუაშვილი დაიკავებდა.
გასული დღეების განმავლობაში გვქონდა კონსულტაციები გრიგოლ ლილუაშვილთან და გაირკვა, რომ ჰქონდა განსხვავებული მიდგომები სამინისტროს საქმიანობის პრინციპებთან, მათ შორის, სამინისტროში გასატარებელ საკადრო პოლიტიკასთან დაკავშირებით. აქედან გამომდინარე, მივიღეთ გადაწყვეტილება, რომ გრიგოლ ლილუაშვილი აღარ დაიკავებს რეგიონული განვითარების მინისტრის თანამდებობას. ამ გადაწყვეტილებამდე მივედით ჩვენ ერთობლივად“, – განაცხადა კობახიძემ.
რაც შეეხება კახაბერ გულედანს, 2022 წლის ივნისიდან ის თბილისის მერის, კახა კალაძის მოადგილე, მანამდე კი სამგორის რაიონის გამგებელი და თბილისის მუნიციპალური ინსპექციის ხელმძღვანელი იყო. 2016-2017 წლებში გულედანი საქართველოს რეგიონული განვითარებისა და ინფრასტრუქტურის მინისტრის მოადგილის თანამდებობას იკავებდა. როგორც ირაკლი კობახიძემ განაცხადა, კახაბერ გულედანს „მართვის და რეგიონულ საკითხებზე მუშაობის ძალიან ფართო გამოცდილება“ აქვს.
დღესვე, „ქართული ოცნების“ პარლამენტმა სახელმწიფო უსაფრთხოების სამსახურის უფროსად, 6 წლის ვადით, ანრი ოხანაშვილი დაამტკიცა. ოხანაშვილი 2024 წლის ნოემბრიდან იუსტიციის მინისტრის თანამდებობას იკავებდა. მას „ქართული ოცნების“ დეპუტატი და 2019-2024 წლებში ტელეკომპანია „რუსთავი 2“-ის გენერალური დირექტორი, პაატა სალია შეცვლის.
