თბილისი-ამსტერდამის მიმართულებით პირდაპირი რეისების შესრულებას „ტრანსავია“ იწყებს

„ეს ძალიან მნიშვნელოვანი სიახლეა საქართველოსთვის, რადგან ნიდერლანდები ჩვენი ქვეყნის ტურიზმისა და ავიაციის ინდუსტრიებისთვის სტრატეგიული სამიზნე მიმართულებაა. ჩვენ განვაგრძობთ საქართველოს პოპულარიზაციას, მარკეტინგული კამპანიების წარმოებას, რათა ჩვენი ქვეყნის ტურისტული პოტენციალი კიდევ უფრო მეტად და ღირსეულად წარმოვადგინოთ ნიდერლანდებში, შედეგად, პირდაპირი რეისებით მივიღოთ ქვეყანაში კიდევ უფრო მეტი ევროპელი ტურისტი“, - განაცხადა ეკონომიკისა და მდგრადი განვითარების მინისტრის მოადგილემ, მარიამ ქვრივიშვილმა.

საქართველოს სტატისტიკის ეროვნული სამსახურის მონაცემებით, 2023 წლის სამ კვარტალში, იანვრიდან სექტემბრის ჩათვლით, ევროკავშირის ქვეყნებიდან (გაერთიანებული სამეფოს გათვალისწინებით) საქართველოში 328 909 ვიზიტი განხორციელდა, მათ შორის, 12 065 ვიზიტორი ნიდერლანდებიდან იყო. გასული პირველ სამ კვარტალში, წინა წლის ანალოგიურ პერიოდთან შედარებით, ნიდერლანდებიდან ვიზიტორების რაოდენობა 33.8%-ით (3048 ვიზიტი) გაიზარდა.

Transavia ნიდერლანდების დაბალბიუჯეტიანი ავიაკომპანიაა, რომელიც ბაზარზე 1966 წლიდან ოპერირებს. ავიაკომპანია Air France KLM ჯგუფის შვილობილი კომპანიაა და ამ ეტაპზე ფლოტში ბოინგის ტიპის საჰაერო ხომალდები ჰყავს. ავიაკომპანიის ხომალდები ბაზირებულია ნიდერლანდების სამეფოს, საფრანგეთისა და გერმანიის აეროპორტებში.