ტრამპი არ ცდილობს რაიმე მისცეს პუტინს, ის ცდილობს უკრაინის გადარჩენას - კელოგი

Fox News-სთან ინტერვიუში კელოგმა თქვა, რომ ტრამპს სურს ომი რაც შეუძლია სწრაფად დაასრულოს.

„როდესაც უყურებთ ზიანს, როცა უყურებთ რა ხდება უკრაინაში, მხოლოდ მსხვერპლია უზარმაზარი – რუსების მსხვერპლი, უკრაინელების მსხვერპლი, ქალაქებისთვის მიყენებული ზიანი. ეს არის ომი, რომელიც უნდა დასრულდეს და ვფიქრობ, რომ ის [ტრამპი] ამას უახლოეს პერიოდში შეძლებს. მე ნამდვილად მაქვს დიდი რწმენა, რომ მას აქვს უნარი, მიაღწიოს პოზიციას, სადაც ეს ომი რეალურად დასრულებული იქნება.

ვფიქრობ, ხალხმა უნდა გაიგოს, რომ ის არ ცდილობს რაიმე მისცეს პუტინს ან რუსებს. ის რეალურად ცდილობს უკრაინისა და მისი სუვერენიტეტის გადარჩენას. ის დარწმუნდება, რომ ეს იქნება თანასწორი და სამართლიანი. ეს მან არაერთხელ თქვა“, - განაცხადა კელოგმა.

გადამდგარი გენერალ-ლეიტენანტის თქმით, „ყველაზე დიდი შეცდომა“, რაც პრეზიდენტმა ჯო ბაიდენმა დაუშვა, არის „ის ფაქტი, რომ ის არასოდეს ყოფილა პუტინთან რაიმე საუბარში ჩართული“ და დასძინა, რომ ტრამპი „ერთნაირად ესაუბრება მოწინააღმდეგეებს და მოკავშირეებს“.

„ის დაელაპარაკება პრეზიდენტ პუტინს და პრეზიდენტ ზელენსკის. ვფიქრობ, ისინი უახლოეს პერიოდში მივლენ გამოსავალამდე. როდესაც ვამბობ უახლოეს პერიოდში, მსურს დავისახო მიზანი პიროვნულ და პროფესიულ დონეზე. ვიტყოდი, მოდით დავისახოთ ასი დღე და უკან დავიხიოთ, თუ ჩვენ შეგვიძლია ამის გაკეთება უახლოეს მომავალში, რათა დავრწმუნდეთ, რომ ეს გამოსავალი იქნება გრძელვადიანი, მდგრადი და რომ ეს ომი დამთავრდება ისე, რომ ჩვენ შევაჩეროთ ხოცვა-ჟლეტა“, - თქვა კელოგმა და დასძინა, რომ ეს ძალიან მნიშვნელოვანი იქნება როგორც აშშ-ის ეროვნული უსაფრთხოებისთვის, ისე ევროპისთვის.

დონალდ ტრამპის ინაუგურაციის ცერემონია 20 იანვარს გაიმართება. წინასაარჩევნო კამპანიის დროს მისი დაპირება იყო, რომ არჩევის შემთხვევაში, რუსეთ-უკრაინის ომის დასრულებას 24 საათში შეძლებდა. მას არ დაუკონკრეტებია, როგორ აპირებდა ამის მიღწევას.