„ერთიანი ნაციონალური მოძრაობის“ ხელისუფლების საქმიანობის შემსწავლელმა კომისიამ, რომელიც „ქართული ოცნების“ პარლამენტშია შექმნილი, რიგით მეოთხე სხდომაზე კოალიცია „ძლიერი საქართველოს“ ლიდერები, მამუკა ხაზარაძე და ბადრი ჯაფარიძე დაიბარა.
ახალი ამბები
მკითხველის რჩეული
- 1 ირლანდიიდან საქართველოს 32 მოქალაქის დეპორტაცია განხორციელდა
- 2 კობახიძე მაღაროელების პროტესტზე: რთულია კერძო ბიზნესს ხელფასების გადახდა მოსთხოვო
- 3 პროკურორი ბაჩიაშვილის ქვეყნიდან წასვლაზე: „აუცილებლად დაიწყება გამოძიება“
- 4 რატომ შეხვდა აშშ-ის ელჩი „ქართული ოცნების“ საგარეო საქმეთა მინისტრს
- 5 მაკრონმა უკრაინაში ცეცხლის ნაწილობრივ შეწყვეტის ერთთვიან გეგმაზე ისაუბრა
- 6 კობახიძე: აქედანვე შემიძლია გითხრათ, რომ თვითმმართველობის არჩევნებს მოვიგებთ
კომისიის მიერ გავრცელებული განცხადების მიხედვით, საქმე ეხება შპს „მაგნატის“ საქმის განხილვას. სხდომაზე მიწვეული არიან კომპანიის მესაკუთრე ჯემალ ლეონიძე და მისი ადვოკატი როინ მიგრიაულიც. სხდომა ხვალ, 25 მარტს, 10:00 საათზეა ჩანიშნული.
კომისიის მდივნის, სოზარ სუბარის განცხადებით, მამუკა ხაზარაძე და ბადრი ჯაფარიძე, „თიბისი ბაკის“ დამფუძნებელები, „ერთიანი ნაციონალური მოძრაობის“ ხელისუფლების „უსამართლობის შემადგენელი ნაწილი იყვნენ“.
„ეს ვლინდება ძალიან ბევრ საქმეში, როცა ხელისუფლება მათი მეშვეობით ადამიანებს ატერორებდა, ადამიანებს ართმევდა ბიზნესს და შემდეგ ეს ბიზნესები ზოგჯერ რჩებოდა ხაზარაძე-ჯაფარიძის ხელში, ზოგჯერ, ამ კონკრეტულ შემთხვევაში, კეზერაშვილის ხელში აღმოჩნდებოდა ხოლმე საბოლოოდ. იკვეთება, რომ არსებობდა ერთიანი, კარგად შემუშავებული სქემა, სადაც ხელისუფლების ხელში იარაღს წარმოადგენდა ეს ორი ადამიანი“, - უთხრა სუბარმა სამთავრობო პროპაგანდისტულ ტელეარხ „იმედს“.
არსებული ინფორმაციით, მამუკა ხაზარაძე და ბადრი ჯაფარიძე ამ საკითხზე განცხადებას მოგვიანებით გაავრცელებენ.
სისხლის სამართლის კოდექსის 349-ე მუხლის მიხედვით, პარლამენტის დროებითი საგამოძიებო კომისიის კანონიერი მოთხოვნის შეუსრულებლობა ისჯება ჯარიმით ან თავისუფლების აღკვეთით ვადით ერთ წლამდე, 350-ე მუხლით კი დასჯადია კომისიისათვის ცრუ ახსნა-განმარტების მიცემა.
რამდენიმე დღის წინ „ქართულმა ოცნებამ“ პარლამენტის რეგლამენტში ცვლილებები დაჩქარებული წესით მიიღო და შედეგად, დროებით საგამოძიებო კომისიას, თავისი საქმიანობის ნებისმიერ ეტაპზე, შეუძლია შესაბამისი ორგანოს წინაშე გამოძიების დაწყების საკითხი დასვას, თუკი იარსებებს გონივრული ეჭვი, რომ ჩადენილია დანაშაულებრივი ქმედება.
„ძლიერი საქართველო“, ისევე როგორც 2024 წლის საპარლამენტო არჩევნებში ბარიერგადალახული დანარჩენი სამი პოლიტიკური გაერთიანება და პარტია, „ქართული ოცნების“ პარლამენტს ლეგიტიმურად არ ცნობს.
