მნიშვნელოვანია, საქართველოს ხელისუფლების აღიარება საქმედ იქცეს – ზახაროვა აგვისტოს ომზე

„დღეს სამხრეთ კავკასიაში მომხდარი ტრაგიკული მოვლენების მეჩვიდმეტე წლისთავია. 2008 წლის 7-8 აგვისტოს ღამეს, მიხეილ სააკაშვილის რეჟიმმა, საქართველო-სამხრეთ ოსეთის კონფლიქტის მოგვარების შესახებ ყველა საერთაშორისო შეთანხმების დარღვევით, შეიარაღებული თავდასხმა განახორციელა სამხრეთ ოსეთზე. [...] იმ სიტუაციაში, როდესაც საერთაშორისო საზოგადოებამ თავი შეიკავა აგრესორის დამშვიდების მცდელობებისგან, რუსეთი იყო ერთადერთი ქვეყანა, რომელმაც დროული და ადეკვატური რეაგირება მოახდინა ამ მზაკვრულ თავდასხმაზე. მოსკოვმა თავდაპირველად საქართველოს მშვიდობისკენ იძულების ოპერაცია ჩაატარა, მოგვიანებით კი სამხრეთ ოსეთი და აფხაზეთი სუვერენულ დამოუკიდებელ სახელმწიფოებად აღიარა“, - განაცხადა მარია ზახაროვამ.

დიპლომატის თქმით, ბოლო ერთი წლის განმავლობაში საქართველოს ხელისუფლებისგან ისმოდა „სამხრეთ ოსეთის წინააღმდეგ მიხეილ სააკაშვილის აგრესიის ფაქტის“ საჯარო აღიარება და ასევე, აფხაზებსა და ოსებთან შერიგების აუცილებლობის შესახებ განცხადებები.

„მნიშვნელოვანია, რომ საქართველოს ხელისუფლების ეს აღიარებები გახდეს განმსაზღვრელი თბილისის მიერ სოხუმთან და ცხინვალთან ურთიერთობების დამყარების მიდგომებში, ასევე, გარდაიქმნას კონკრეტულ პრაქტიკულ საქმეებად.

პირველი რიგის ამოცანებს შორისაა საქართველოს მიერ აფხაზეთისა და სამხრეთ ოსეთის წინააღმდეგ ძალის გამოუყენებლობის შესახებ იურიდიულად სავალდებულო შეთანხმების დადება, რაც არა მხოლოდ 2008 წლის აგვისტოს ტრაგიკული მოვლენების განმეორების საიმედო გარანტიაა, არამედ საწყის წერტილსაც წარმოადგენს თბილისი-სოხუმი-ცხინვალის სამკუთხედში ნორმალიზაციისკენ სვლისთვის.

საქართველო-აფხაზეთის და საქართველო-სამხრეთ ოსეთის საზღვრების დელიმიტაციის დაწყება და მათი შემდგომი დემარკაცია ხელს შეუწყობს სამი სახელმწიფოს სასაზღვრო რაიონებში სიტუაციის სტაბილიზაციას.

[...] რუსეთი, როგორც აფხაზეთის, საქართველოსა და სამხრეთ ოსეთის უახლოესი მეზობელი, მზადაა, ყველა შესაძლო დახმარება გაუწიოს ამ პროცესებს“, - განაცხადა მარია ზახაროვამ.

„ქართული ოცნების“ საგარეო საქმეთა სამინისტრომაც დღეს, 8 აგვისტოს გაავრცელა განცხადება რუსეთის მიერ საქართველოს წინააღმდეგ განხორციელებული სამხედრო აგრესიის მე-17 წლისთავთან დაკავშირებით. უწყება „მოუწოდებს რუსეთის ფედერაციას, შეცვალოს ოკუპირებული ტერიტორიების ე.წ. დამოუკიდებლობის აღიარების შესახებ მიღებული უკანონო გადაწყვეტილება, პატივი სცეს საქართველოს სუვერენიტეტსა და ტერიტორიულ მთლიანობას, შეასრულოს 2008 წლის 12 აგვისტოს ცეცხლის შეწყვეტის შეთანხმებით ნაკისრი ვალდებულებები, გაიყვანოს თავისი ძალები საქართველოს ტერიტორიიდან და ხელი არ შეუშალოს იძულებით გადაადგილებულ პირთა და ლტოლვილთა საკუთარ სახლებში დაბრუნებას“.

2008 წლის ომის დაწყებაში, რუსეთის ხელისუფლების მსგავსად, „ქართული ოცნების“ ლიდერებიც საქართველოს მაშინდელ ხელისუფლებას ადანაშაულებენ. „სააკაშვილის რეჟიმმა დაიწყო ომი ცხინვალში“, - განაცხადა „ქართული ოცნების“ პრემიერ-მინისტრმა, ირაკლი კობახიძემ და დაამატა, რომ ეს „დიფ სთეითის“ დაკვეთა იყო.