Աբխազիայի դե ֆակտո արտգործնախարար է նշանակվել Սերգեյ Շամբան

Ինալ Արձինբան, ով դե ֆակտո արտաքին գործերի նախարարությունը ղեկավարում էր 2021 թվականից, մայիսի 7-ին ազատվել է զբաղեցրած պաշտոնից։ Այդ ժամանակվանից նախարարի պարտականությունները կատարում էր նրա տեղակալներից մեկը՝ Օդիսեյ Բիգվան։

Սերգեյ Շամբան 73 տարեկան է։ Նա 1997-2010 թվականներին եղել է դե ֆակտո Աբխազիայի Հանրապետության արտաքին գործերի նախարարը, իսկ 2010-2011 թվականներին զբաղեցրել է այսպես կոչված վարչապետի պաշտոնը, եղել է նաև նախագահի թեկնածու և պատգամավոր։ Նա դե ֆակտո Անվտանգության խորհրդի քարտուղար է նշանակվել 2020 թվականին։

Անցյալ տարեվերջին Սերգեյ Շամբան խոսել է վրացիների և աբխազների միջև փոխըմբռնման հաստատման համար հաղորդակցության կարևորության մասին և հայտարարել, որ «անհրաժեշտ է խաղաղ գոյակցության հնարավորություններ փնտրել»։

«Ես բազմիցս խոսել եմ այս թեմայի շուրջ, և աբխազական համայնքում շատերին դուր չի գալիս իմ դիրքորոշումը, բայց ես միշտ ասել եմ, որ եթե խնդիր կա, առաջինը դուք պետք է խոսեք։ Չկան հարևան, մերձավոր կամ նույնիսկ հարազատ ժողովուրդներ, որոնք չեն պատերազմել իրար հետ։ Սրա օրինակն է ողջ Եվրոպան... Ես միշտ աջակցել եմ հանրային դիվանագիտությանը, և երբ ես արտգործնախարար էի, մեր ներկայացուցիչները շատ հաճախ էին հանդիպում վրացի հակառակորդների հետ։ Դա հնարավորություն էր հասկանալու միմյանց դիրքորոշումները։ Շատ կարևոր է ինչ-որ կերպ սկսել խնդիրը լուծել։ Ես այսօր էլ սատարում եմ դրան»,- ասել է Սերգեյ Շամբան։

Նրա խոսքով՝ շատերը դեռևս ագրեսիվ են՝ թե՛ աբխազական, թե՛ վրացական կողմից, սակայն «դա ժամանակի ընթացքում կանցնի»։