Ամերիկյան կողմը մոտեցել է կրիտիկական եզրագծին. Կոբախիձեն՝ Դաննիգանին

Վրաստանի կառավարության վարչակազմի տարածած հաղորդագրության համաձայն՝ հանդիպմանը վարչապետն իր մտահոգությունն է հայտնել ԱՄՆ Պետդեպարտամենտի երեկվա որոշման կապակցությամբ։

«Նա նշել է, որ այս որոշմամբ ամերիկյան կողմը մոտեցել է կրիտիկական եզրագծին, որը նմանատիպ մեկ այլ որոշման դեպքում կարող է հանգեցնել վրաց-ամերիկյան հարաբերությունների առնչությամբ Վրաստանի դիրքորոշման որակական վերանայման։

Հանդիպմանը նշվել է, որ ԱՄՆ Պետդեպարտամենտի անունից ընդունված որոշումը նպատակաուղղված է ընտրություններից առաջ ընդդիմության շանսերը բարելավելուն, սակայն այն լիովին հակաարդյունավետ է, քանի որ իրականում դա չի օգնի ընդդիմության ընտրական արդյունքներին, ոչ էլ կարող է վախեցնել իշխող թիմին։

Ինչպես ասել է վարչապետը, ընդհակառակը, իշխող թիմը վստահ է, որ Պետդեպարտամենտի անունից ընդունված որոշումը էլ ավելի կամրապնդի հասարակության մոտիվացիան՝ հոկտեմբերի 26-ին ամուր կանգնելու Վրաստանի անկախությունն ու ինքնիշխանությունը պաշտպանելու համար»,- ասվում է հայտարարության մեջ։

Սեպտեմբերի 16-ին ԱՄՆ գանձապետարանը ֆինանսական պատժամիջոցներ է սահմանել Վրաստանի ՆԳՆ հատուկ հանձնարարությունների դեպարտամենտի տնօրեն Զվիադ Խարազիշվիլիի, նույն ինքը՝ «Խարեբայի» և նրա տեղակալներից մեկի՝ Միլեր Լագազաուրիի նկատմամբ։ Պատժամիջոցների հիմքում ընկած է նրանց մասնակցությունը մարդու իրավունքների լուրջ խախտումներին ռուսական օրենքի դեմ խաղաղ ցույցերի բռնի ճնշման ժամանակ։

Բացի այդ, Պետդեպարտամենտը հայտարարել է, որ վիզային սահմանափակումներ է մտցրել Վրաստանի ավելի քան 60 քաղաքացիների և նրանց ընտանիքների անդամների նկատմամբ, ովքեր պատասխանատու են կամ մասնակից են Վրաստանում ժողովրդավարության խաթարմանը։ Պատժամիջոցների ենթարկվածների անուններն ու ազգանունները չեն բացահայտվում, սակայն, ըստ գերատեսչության, նրանց թվում են կառավարության և մունիցիպալ մակարդակի բարձրաստիճան պաշտոնյաներ, ովքեր չարաշահել են իրենց լիազորությունները, բիզնես առաջնորդներ, ապատեղեկատվություն տարածող և բռնի ծայրահեղականություն քարոզող անհատներ, իրավապահ պաշտոնյաներ։