ԱՄՆ-ի պատժամիջոցները քաղաքացիների վրա տարածվում է դատարանի մեղադրական դատավճռի դեպքում․ ՎԱԲ

Ազգային բանկը վկայակոչում է Նաթիա Թուրնավայի 2023 թվականի սեպտեմբերի 19-ի հրամանը, որով հաստատվում են բանկերի կողմից պատժամիջոցների ռեժիմների կիրառման կանոնները։

«Նշված կարգի համաձայն՝ պատժամիջոցների ռեժիմը գործում է Վրաստանի քաղաքացու նկատմամբ այն դեպքում, երբ կիրառված պատժամիջոցների հիմքի վերաբերյալ վրացական դատարանի օրինական ուժի մեջ մտած մեղադրական դատավճիռ է կայացվել։ Ըստ այդմ, վերոնշյալ կարգում նշված է կատարման ենթակա պատժամիջոցների հետ կապված ընդհանուր սկզբունքը։

Վրաստանի Ազգային բանկը համակարգված վերահսկողություն է իրականացնում ֆինանսական հատվածի առանձին մասնակիցների կողմից միջազգային պատժամիջոցների, ինչպես նաև իր իսկ կանոնակարգերի և ազգային օրենսդրության կատարման նկատմամբ:

Այստեղ ընդգծում ենք, որ վրացական ֆինանսական հատվածը գործում է պատժամիջոցների ռեժիմով սահմանված պահանջներին լիովին համապատասխան։ Վրաստանը երբեք չի եղել և չի լինի պատժամիջոցներից խուսափելու վայր», - ասվում է Ազգային բանկի հայտարարության մեջ։

Սեպտեմբերի 16-ին ԱՄՆ գանձապետարանը ֆինանսական պատժամիջոցներ է սահմանել Վրաստանի ՆԳՆ հատուկ հանձնարարությունների դեպարտամենտի տնօրեն Զվիադ Խարազիշվիլիի, նույն ինքը՝ «Խարեբայի» և նրա տեղակալներից մեկի՝ Միլեր Լագազաուրիի նկատմամբ։ Պատժամիջոցների հիմքում ընկած է նրանց մասնակցությունը մարդու իրավունքների լուրջ խախտումներին ռուսական օրենքի դեմ խաղաղ ցույցերի բռնի ճնշման ժամանակ։ Ֆինանսական պատժամիջոցների են ենթարկվել նաև խաղաղ ցույցերի վրա հարձակումների կազմակերպիչները՝ «Ալտ-Ինֆո»-ի առաջնորդներ Կոնստանտին Մորգոշիան և Զուրաբ Մախարաձեն։

Ֆինանսական պատժամիջոցները սառեցնում են պատժամիջոցների ենթարկված անձանց ողջ ունեցվածքը և գույքային շահերը, որոնք նրանք ունեն Միացյալ Նահանգներում կամ պատկանում կամ վերահսկվում են ԱՄՆ քաղաքացիների կողմից: Բացի այդ, ֆինանսական հաստատությունները և այլ անձինք, որոնք գործարքներ են կնքում կամ գործունեություն են ծավալում պատժամիջոցների ենթարկված անձանց հետ, իրենք նույնպես կարող են ենթարկվել ԱՄՆ պատժամիջոցների:

2023 թվականի սեպտեմբերի 19-ին Ազգային բանկը փոխել է պատժամիջոցների կիրարկման կանոնները՝ բանկի նախագահի պաշտոնակատար Նաթիա Թուրնավայի հրամանի հիման վրա։ Դա տեղի է ունեցել այն բանից հետո, երբ սեպտեմբերի 14-ին ԱՄՆ-ը պատժամիջոցներ է կիրառել Վրաստանի նախկին գլխավոր դատախազ Օթար Փարցխալաձեի նկատմամբ։ Պետդեպարտամենտի տվյալներով՝ Ռուսաստանի Անվտանգության դաշնային ծառայությունը աշխատել է վրացի-ռուս օլիգարխ Փարցխալաձեի հետ՝ վրաց հասարակության և քաղաքականության վրա հօգուտ Ռուսաստանի ազդելու համար։