ԱՄՆ-ը պատժամիջոցների է ենթարկել Օթար Փարցխալաձեին, նախկին գլխավոր դատախազի հետ «Էֆ Էս Բե»-ն է աշխատել

Ի պատասխան Վրաստանում Ռուսաստանի վնասակար ազդեցության՝ ԱՄՆ-ն Փարցխալաձեի հետ միասին պատժամիջոցներ է կիրառել ռուսական հետախուզության աշխատակից Ալեքսանդր Օնիշչենկոյի նկատմամբ։

«Անվտանգության դաշնային ծառայության (FSB) սպա Օնիշչենկոն հավանաբար օգնել է իր համախոհ Փարցխալաձեին ստանալ ռուսական անձնագիր և, հնարավոր է, Ռուսաստանի քաղաքացիություն։ Փարցխալաձեն լիովին ընդունել է ռուսական ինքնությունը և պարբերաբար այցելում է Ռուսաստան։ Օնիշչենկոն և FSB-ն օգտագործել են Փարցխալաձեին հօգուտ Ռուսաստանի՝ վրաց հասարակության և քաղաքականության վրա ազդելու համար: Ըստ տեղեկությունների՝ Փարցխալաձեն անձնական օգուտներ է ստանում FSB-ի հետ իր կապից»,- ասվում է Պետդեպարտամենտի հաղորդագրության մեջ։

Պետդեպարտամենտը պատժամիջոցներ է կիրառել նաև Ռուսաստանում գործող երկու ընկերությունների նկատմամբ, որոնց 50-ական բաժնեմասերը պատկանում են Փարցխալաձեին։ Դրանք են՝ ՍՊԸ-ներ Moscow Business Brokerage-ը և International Business Corporation-ը:

ԱՄՆ գանձապետարանի արտաքին ակտիվների վերահսկման գրասենյակն այսօր՝ սեպտեմբերի 14-ին է Փարցխալաձեին և նրա ընկերություններին ներառել պատժամիջոցների ցանկում։

«Վրաստանի լուրերը» 2023 թվականի փետրվարի 14-ին գրել էր, որ Վրաստանի նախկին գլխավոր դատախազը «Մոսկովսկի Բիզնես Բրոկերիջ» ընկերության միջոցով հաճախորդներին առաջարկում է ներդրումային բիզնես նախագծեր՝ ներգաղթի արտոնություններով, այդ թվում՝ Վրաստանում։ Ներգաղթի արտոնությունները ներառում են ներդրումների միջոցով մշտական ​​բնակության իրավունքի, աշխատանքային վիզաների և քաղաքացիության ձեռքբերում:

Օթար Փարցխալաձեն Վրաստանի գլխավոր դատախազի պաշտոնում աշխատել է 2013 թվականի նոյեմբերի 21-ից մինչև դեկտեմբերը ներառյալ։ Մինչ այդ նա ղեկավարել է Ֆինանսների նախարարության քննչական ծառայությունը։