Անվստահելի ռեժիմը Վրաստանը տանում է դեպի ռուսական ոճի անձնիշխանություն. սենատորներ

Հելսինկյան հանձնաժողովի համանախագահ, դեմոկրատ Բեն Քարդինի և բարձրաստիճան անդամներ հանրապետականներ Ռոջեր Ուիքերի և Ջոն Քորնինի համատեղ հայտարարության մեջ ասվում է, որ «Վրացական երազանքի» որոշումը՝ դուրս գալ Եվրամիությանն անդամակցելու բանակցություններից, լուրջ դավաճանություն է վրաց ժողովրդի՝ եվրոպական արժեքներն ու ինստիտուտներն ընդունելու հստակ և համոզիչ ձգտումներին։

Սենատորներն իրենց աջակցությունն են հայտնում վրաց ժողովրդին, որը «խաղաղ կերպով պաշտպանում է իր ժողովրդավարական և եվրոպական նկրտումները «Վրացական երազանք» կուսակցության դաժան բռնաճնշումներից»։

«Սա ոչ թե ժողովրդավարական բարեփոխումների և բազմակարծության հակված կառավարության պահվածքն է, այլ անվստահելի ռեժիմի, որը Վրաստանը տանում է դեպի ռուսական ոճի անձնիշխանություն։ Այս գործողությունները կոպտորեն խախտում են միջազգային ժողովրդավարական նորմերը և խարխլում վրաց ժողովրդի օրինական ձգտումները։

Մենք խստորեն դատապարտում ենք խաղաղ ցուցարարների նկատմամբ սանձազերծված բռնությունները. Թբիլիսիի փողոցներում չպետք է լինեն արցունքաբեր գազը, ռետինե փամփուշտները, ջրի շիթերը, ծեծը և զանգվածային ձերբակալությունները։

Վրաստանի կառավարությունը, որը պատասխանատու է մարդու իրավունքների խախտումների և ժողովրդավարական սկզբունքների խախտման համար, պետք է պատասխան տա սեփական ժողովրդի և միջազգային հանրության առաջ։ Վրաց ժողովրդի անձնազոհությունը եվրաատլանտյան ինտեգրման համար պահանջում է մեր մշտական ​​համերաշխությունն ու գործողությունները»,- ասված է սենատորների հայտարարության մեջ։

Նոյեմբերի 28-ին Վրաստանի ոչ լեգիտիմ վարչապետ Իրակլի Կոբախիձեն հայտարարեց, որ Վրաստանը մինչև 2028 թվականի վերջ օրակարգ չի մտցնի անդամակցության բանակցությունների մեկնարկը և կհրաժարվի ԵՄ բյուջետային դրամաշնորհներից։

«Վրացական երազանքի» որոշմանը հաջորդած բողոքի ակցիաները դաժանորեն ցրվում են ոստիկանական ուժերի կողմից։ Ցուցարարների դեմ օգտագործվում են արցունքաբեր գազ, ջրցան մեքենաներ և այլ հատուկ միջոցներ։ Հավանաբար, օգտագործվել են նաև ռետինե փամփուշտներ։ Նոյեմբերի 28-ից հետո ՆԳՆ-ն ձերբակալել է ցույցի ավելի քան 300 մասնակիցների, նրանց մեծ մասին ծեծի են ենթարկել հատուկ ջոկատայինները։

ԱՄՆ Պետդեպարտամենտը դադարեցրել է Վրաստանի հետ ռազմավարական գործընկերությունը «Վրացական երազանքի» հակաժողովրդավարական գործողությունների պատճառով։ Ըստ Իրակլի Կոբախիձեի, «սա սկզբունքային նշանակություն չի կարող ունենալ»։ «Վրացական երազանքի» կառավարությունը մտադիր է այս հարցը քննարկել Դոնալդ Թրամփի վարչակազմի հետ։