Արդեն ճանաչեցին ընտրությունների լեգիտիմությունը, երբ չհրաժարվեցին ֆինանսավորումից. Կոբախիձեն՝ ընդդիմության մասին

«Միգուցե փետրվարին մեզնից շուտ մտնեն Վրաստանի խորհրդարան։ Նրանք այսօր արդեն ճանաչել են ընտրությունների լեգիտիմությունը, երբ չհրաժարվեցին ֆինանսավորում ստանալուց։ Եթե ​​դուք չեք ընդունում արդյունքները, ինչպե՞ս եք այդ արդյունքների հիման վրա ֆինանսավորում ստանում, չէ՞։

Պարզ է՝ երբ նրանք ստիպված էին շոշափելի օգուտների հետ գործ ունենալ, անմիջապես ճանաչեցին ընտրությունների արդյունքները, և իհարկե այս գործընթացը կշարունակվի»,- ասել է Իրակլի Կոբախիձեն իշխանական «Իմեդի» հեռուստաընկերության եթերում։

Կենտրոնական ընտրական հանձնաժողովի տվյալներով՝ հոկտեմբերի 26-ի խորհրդարանական ընտրությունների արդյունքներով, նորընտիր խորհրդարանի լիազորությունների ճանաչման երկրորդ օրվանից՝ նոյեմբերի 26-ից, յոթ կուսակցություն/ընտրական սուբյեկտ իրավունք են ստացել պետական ​​ֆինանսավորում ստանալ։ Ըստ ԿԸՀ-ի արդյունքների՝ նրանցից չորսն ընտրություններում հաղթահարել են 5 տոկոսի շեմը։

ԿԸՀ նախագահի նոյեմբերի 26-ի հրամանագրով քաղաքական կուսակցությունների տարեկան ֆինանսավորումը սահմանվել է հետևյալ կերպ.

• «Վրացական երազանք» - 6 100 265 լարի,
• «Միասնություն-Ազգային շարժում» - 1 556 080 լարի,
• «Հանուն փոփոխությունների կոալիցիա, Գվարամիա Մելիա Գիրչի Դրոա» - 1 645 805 լարի,
• «Գախարիան հանուն Վրաստանի» - 1 307 605 լարի,
• «Ուժեղ Վրաստան - Լելո, Հանուն ժողովրդի, Հանուն ազատության» - 1 414 610 լարի,
• «Վրաստանի հայրենասերների դաշինք» - 752 995 լարի,
• «Գիրչի» - 811 115 լարի։

Ըստ ԿԸՀ-ի՝ նշված յոթ կուսակցություններից միայն «Հանուն փոփոխությունների կոալիցիան» է հրաժարվել պետական ​​ֆինանսավորում ստանալուց։

«Դեկտեմբերի 26-ին, ժամը 18:00-ին լրացել է խորհրդարանական ընտրությունների արդյունքներով ստացված ֆինանսավորումից հրաժարվելու քաղաքական կուսակցությունների վերջնաժամկետը»,- հայտարարել է ԿԸՀ-ն։