Ախալցիխեի սակրեբուլոյի «Ազգային շարժում» խմբակցությունը լուծարվել է

«Անցյալ տարի, երբ կուսակցության նախագահի ընտրություններն էին, Ախալցիխեի շրջանային կազմակերպությունը սատարում էր Նիկա Մելիային։ Նոր նախագահի [Լևան Խաբեիշվիլի] ընտրությունից հետո կուսակցության ղեկավարությունը 7 ամիս չի շփվել մեզ հետ։ Նրանք մի քանի անգամ եղել են մեր տարածաշրջանում, բայց չեն եկել Ախալցիխե։ Նույնիսկ կուսակցության համագումարին չեն հրավիրել»,- ասում է խմբակցության նախկին նախագահ Դավիթ Ախալկացին։

Լևան Խաբեիշվիլին «Ազգային շարժման» նախագահ է ընտրվել այս տարվա հունվարին։ Կուսակցության գործող նախագահ Նիկա Մելիան նույնպես մասնակցել է ընտրություններին, սակայն պարտվել է։

Խաբեիշվիլիի՝ կուսակցության նախագահ ընտրվելուց հետո խորհրդարանի անդամներ Խատիա Դեկանոիձեն և Ռոման Գոցիրիձեն լքել են «Ազգային շարժումը»։

Ախալցիխեի մունիցիպալիտետի սակրեբուլոյում գրանցվել է ընդհանուր առմամբ երեք խմբակցություն՝ «Վրացական երազանք», «Ազգային շարժում» և «Ախալցիխեն հանուն Վրաստանի»։

Ախալցիխեի մունիցիպալիտետի սակրեբուլոն ունի 38 անդամ։

Ախալցիխեի քաղաքային խորհրդի կողմից «Վրաստանի լուրերին» 2023 թվականի մարտին տրամադրված տեղեկատվության համաձայն՝ 2021 թվականի հոկտեմբերի 2-ի ընտրություններից հետո գործող քաղաքային խորհրդի խմբակցություններից և ոչ մեկը վարչական-իրավական ակտերի նախագծեր չի ներկայացրել, ոչ մի խմբակցություն ժամանակավոր աշխատանքային խմբի ստեղծման խնդրանք չի ներկայացրել, խմբակցություններից ոչ մեկը հարցեր չի ուղարկել ավագանու ստեղծած մարմիններին և ավագանուն հաշվետու պաշտոնյաներին, խմբակցությունները չեն հրավիրել սակրեբուլոյի արտահերթ նիստ։

2022 թվականին տեղական բյուջեից Ախալցիխեի մունիցիպալիտետի սակրեբոլոյի խմբակցությունների նախագահների և նրանց տեղակալների աշխատավարձերի համար ծախսվել է 290 712 լարի, ճանապարհածախսի և վառելիքի ծախսերի համար՝ 38 090 լարի,  ընդհանուր 328 802 լարի։

«Վրացական երազանք» խմբակցության նախագահն ունի միաժամանակ 7 տեղակալ։ Նրանցից յուրաքանչյուրի ամսական աշխատավարձը կազմում է 1 760 լարի։