ახალციხის საკრებულოში „ნაციონალური მოძრაობის“ ფრაქცია დაიშალა

„გასულ წელს, პარტიაში თავმჯდომარის არჩევნები რომ ჩატარდა, ახალციხის რაიონული ორგანიზაცია მხარს ნიკა მელიას უჭერდა. ახალი თავმჯდომარის [ლევან ხაბეიშვილის] არჩევის შემდეგ, პარტიის ხელმძღვანელობას 7 თვის განმავლობაში ჩვენთან არანაირი კომუნიკაცია არ ჰქონია. ჩვენს რეგიონში რამდენჯერმე იმყოფებოდნენ, მაგრამ ახალციხეში არ მოვიდნენ. პარტიის ყრილობაზეც კი არ მიგვიწვიეს“, - ამბობს ფრაქციის ყოფილი თავმჯდომარე დავით ახალკაცი.

ლევან ხაბეიშვილი „ნაციონალური მოძრაობის“ თავმჯდომარედ მიმდინარე წლის იანვარში აირჩიეს. არჩევნებში პარტიის მოქმედი თავმჯდომარე ნიკა მელიაც მონაწილეობდა, რომელიც დამარცხდა.

პარტიის თავმჯდომარედ ხაბეიშვილის არჩევის შემდეგ „ნაციონალური მოძრაობა“ დატოვეს პარლამენტის წევრებმა ხატია დეკანოიძემ და რომან გოცირიძემ.

ახალციხის მუნიციპალიტეტის საკრებულოში სულ სამი ფრაქცია იყო რეგისტრირებული - „ქართული ოცნება“, „ნაციონალური მოძრაობა“ და „ახალციხე საქართველოსთვის“.

ახალციხის მუნიციპალიტეტის საკრებულოს 38 წევრი ჰყავს.

ახალციხის საკრებულოს მიერ, „საქართველოს ამბებისთვის“ 2023 წლის მარტში მოწოდებული ინფორმაციის თანახმად, 2021 წლის 2 ოქტომბრის არჩევნების შემდეგ, მოქმედ საკრებულოში არცერთ ფრაქციას არ წარუდგენია ადმინისტრაციულ-სამართლებრივი აქტების პროექტები; არცერთ ფრაქციას არ მოუთხოვია დროებითი სამუშაო ჯგუფის შექმნა; არცერთ ფრაქციას საკრებულოს მიერ შექმნილი ორგანოებისა და საკრებულოს წინაშე ანგარიშვალდებული თანამდებობის პირებისთვის შეკითხვები არ გაუგზავნია; საკრებულოს რიგგარეშე სხდომა ფრაქციების მიერ არ მოწვეულა.

2022 წელს ახალციხის მუნიციპალიტეტის საკრებულოს ფრაქციების თავმჯდომარეებისა და მათი მოადგილეებისთვის ხელფასის სახით ადგილობრივი ბიუჯეტიდან დახარჯულია 290 712 ლარი, სამივლინებო და საწვავის ხარჯებისთვის 38 090 ლარი, ჯამში 328 802 ლარი.

ფრაქცია „ქართული ოცნების“ თავმჯდომარეს ერთდროულად 7 მოადგილე ჰყავს. თითოეული მათგანის ყოველთვიური ხელფასი 1760 ლარია.