Այլ կերպ աշխատելու պայմաններում ոչ մի մարդ ավելի չէր փրկվի․ Կոբախիձեն՝ Շովիի մասին

«Ես կարող եմ կրկնել այն տեղեկությունը, որն ունեմ։ Գործընթացներն արդյունավետ են իրականացվել։

Եթե ​​պատկերացնենք այլ սցենար՝ տարբեր, այսպես ասած, աշխատանքային պայմաններում, ոչ մի մարդ ավելի չէր կարող ողջ մնալ։ Սա մի բան է, որի համար մենք, հավանաբար, կարող ենք պատասխանատվություն կրել:

Սակայն, բնականաբար, բոլորը կսպասեն տեղեկատվության ամեն ինչի վերաբերյալ»,- լրագրողներին ասել է Կոբախիձեն։

Հարցին, թե արդյոք նա հետաքրքրվել է, թե ով է որոշում կայացրել օգոստոսի 3-ի գիշերը դադարեցնել փրկարարական աշխատանքները, Իրակլի Կոբախիձեն ասել է, որ աշխատանքները չեն դադարեցվել և շարունակվել են ողջ գիշերվա ընթացքում։

«Եթե խոսքը ուղղաթիռների մասին է, ապա դրա վերաբերյալ հարց կար, և այս հարցին պատասխան տրվեց։ Ինչ վերաբերում է աշխատանքների դադարեցմանը, ապա աշխատանքները չեն դադարեցվել։ Ողջ գիշեր անօդաչու թռչող սարքերը, այդ թվում՝ գիշերային տեսողության սարքավորումներով, զննում էին տարածքը և, բնականաբար, փրկարարական աշխատանքները շարունակվում էին այդ հիմքով։ Միակ թեման, իհարկե, ուղղաթիռներն էին, իսկ ուղղաթիռների դեպքում պետք է հստակեցնել, որ երբ խոսքը վերաբերում է գիշերային տեսողության սարքավորումներին, կարող եք ստուգել, ​​ես ունեմ այս տեղեկությունը՝ գիշերային տեսողության սարքավորումները չեն բարելավում անվտանգության ստանդարտները։ Հետևաբար, նույնիսկ նման սարքավորումների դեպքում օդաչուները թռիչքի ժամանակ նույն վտանգի տակ են, ինչ ցանկացած այլ դեպքում։ Գիշերային տեսողության սարքավորումը պարզապես հեշտացնում է առարկաների նույնականացումը, սակայն այդպիսի առարկաների, այդ թվում՝ մարդկանց, դիակների և այլնի նույնականացումը հնարավոր է նույնքան արդյունավետ անօդաչու սարքերի միջոցով: Ուստի աշխատանքները չեն դադարեցվել, աշխատանքները շարունակվել են ողջ այս ընթացքում փրկարար ծառայությանը հասանելի միջոցներով»,- ասել է Կոբախիձեն։

Շովիի հարցով խորհրդարանի ժամանակավոր քննիչ հանձնաժողով ստեղծելու նախաձեռնության վերաբերյալ «Վրացական երազանքի» նախագահն ասել է, որ դատախազությունն այն իրավասու մարմինն է, որը մանրամասն կուսումնասիրի բոլոր մանրամասները։

«Նույնիսկ տեղեկություններ են հրապարակվել տեղում տիրող իրավիճակի մասին, թե ինչ վիճակում են գտնվել մարդիկ և այլն։ Ամեն ինչի հետ կապված, բնականաբար, նախաքննության շրջանակներում նախ պետք է մանրամասն տեղեկություններ ներկայացնի դատախազությունը։ Ցանկացած երկրում դա ստանդարտ է լինում՝ նախ ստանդարտ հետաքննություն կանցկացնի համապատասխան գերատեսչությունը, Վրաստանի դեպքում դա դատախազությունն է, և եթե հարցեր լինեն, դրանից հետո կարող է քննիչ հանձնաժողով ստեղծվել»,- ասել է Կոբախիձեն՝ նշելով, որ դա է իրական պատճառը, որ «Վրացական երազանքը» չի սատարի քննիչ հանձնաժողովի ստեղծմանը։

Օգոստոսի 3-ին Ռաճայում՝ Բուբա լեռից սկիզբ առած սելավը գրեթե ամբողջությամբ ավերել է Շովի հանգստավայրը։ Փրկարարական գործողությունը սկսվել է 3 ժամ ուշացումով, իսկ օրվա վերջում օդաչուները դադարեցրել են օպերացիային մասնակցելը, քանի որ ուղղաթիռը գիշերը չի կարողացել անվտանգ թռչել։ Օգոստոսի 3-4-ին աղետի գոտուց տարհանվել է 210 մարդ։ Այս պահի դրությամբ՝ հայտնաբերվել է 26 դի և 3 մարդու մարմնի մասեր, 7 անհետ կորած դեռ որոնվում է։

Ներքին գործերի նախարարը, որին ենթակա է արտակարգ իրավիճակների կառավարման ծառայությունը, ջրհեղեղից հետո՝ 11-րդ օրը, օգոստոսի 13-ին է ժամանել Շովի։ Լրագրողների հետ զրույցում նա ասել է, որ նախարարությունը գիշերային թռիչքների հնարավորություն ուներ, և ուղղաթիռները կարող էին թռչել, սակայն «եթե այդ պահին մարդու կյանքին իրական վտանգ չի սպառնում, օդաչուներին վտանգի ենթարկել չի կարելի, տեղին չէ»։

ՆԳՆ-ն աղետի փաստով հետաքննություն է սկսել քրեական օրենսգրքի երկու հոդվածներով (անզգուշությամբ մարդկային կորուստներ և անվտանգության կանոնների խախտում հանքարդյունաբերության, շինարարական կամ այլ աշխատանքների ժամանակ): Բացի այդ, վարչապետ Իրակլի Ղարիբաշվիլին և կառավարության այլ ներկայացուցիչներ հայտարարում են, որ հնարավոր չի եղել կանխել կատարվածը, ինչի հետ համաձայն չեն անկախ փորձագետները։