Ազգային բանկի խորհրդի երկու թափուր պաշտոններում ընտրվել են Նանա Կեինիշվիլին և Թեյմուրազ Խոմերիկին

Քվեարկությունից առաջ Վրաստանի նախագահ Սալոմե Զուրաբիշվիլին հայտարարել է, որ վերջին երկու օրվա ընթացքում Ազգային բանկում տեղի ունեցող զարգացումների հետո ետ է կանչելու երկու թեկնածությունները։

«Նախագահը չի հավատում, որ ստեղծված իրավիճակում, երբ պարզ չէ՝ Ազգային բանկը ծառայում է վրաց ժողովրդին, թե կոնկրետ անձանց, նա պետք է ներկայացնի Ազգային բանկի խորհրդի անդամության թեկնածուներին։ Ըստ այդմ՝ թեկնածուները հանձնաժողովների նիստերին ներկա չեն։ Նշված իրավիճակում, քանի դեռ Ազգային բանկի շուրջ ստեղծված իրավիճակը չի պարզվել, Ազգային բանկի նախագահի պաշտոնակատարի 2023 թվականի սեպտեմբերի 19-ի հրամանագիրը չի չեղարկվել, մինչ այդ մենք անհարիր ենք համարում թեկնածուներին ներկայացնելը»,- ասել է նախագահի խորհրդարանական քարտուղարը։ Չնայած դրան, հանձնաժողովը նպատակահարմար է համարել թեկնածուների առաջադրումը լիագումար նիստում։

Սեպտեմբերի 20-ին Ազգային բանկի խորհուրդը լքեցին երեք անդամներ՝ Նիկոլոզ Գագուան, Արչիլ Մեստվիրիշվիլին և Պապունա Լեժավան։ Երեքն էլ զբաղեցնում էին փոխնախագահի պաշտոնը։ Նրանք հրաժարականի որոշում են կայացրել այն բանից հետո, երբ Ազգային բանկի նախագահի պաշտոնակատար Նաթելա Թուրնավան սեպտեմբերի 19-ին փոխել է պատժամիջոցների կիրառման կանոնը, որն այլևս չի պարտավորեցնում առևտրային բանկերին պատժամիջոցներ կիրառել ԱՄՆ-ի կողմից պատժամիջոցների ենթարկված նախկին գլխավոր դատախազ Օթար Փարցխալաձեի նկատմամբ։ Վրաստանի նախագահի խոսքով՝ Թուրնավան այս որոշումը կայացրել է առանց Ազգային բանկի խորհրդի անդամների հետ համաձայնեցնելու, առանց նրանց նախապես տեղյակ պահելու։

Ազգային բանկի խորհուրդը պետք է ունենա 9 անդամ, այժմ մնացել է 4 անդամ՝ Նաթելա Թուրնավան, Էկա Գալդավան, Էկա Միքաբաձեն և Ռիչարդ Սինգլետարին։ «Ազգային բանկի մասին» օրենքի համաձայն՝ եթե խորհրդի անդամների թիվը 5-ից պակաս է, ապա Ազգային բանկի խորհուրդն իրավասու չէ իրականացնել իր գործառույթները։

Նանա Կեինիշվիլին ավարտել է Վրաստանի գյուղատնտեսական ինստիտուտը՝ Աշխատանքային կարմիր դրոշի շքանշանով, պտղաբուծություն, այգեգործություն և խաղողագործություն մասնագիտությամբ։ 2012-2018 թվականներին եղել է Վրաստանի խորհրդարանի պատգամավոր «Բիձինա Իվանիշվիլի-Վրացական երազանք» ընտրական դաշինքից՝ կուսակցական ցուցակով։ 2001-2012 թվականներին եղել է Վրաստանի Կարմիր խաչի ընկերության նախագահը։

Թեյմուրազ Խոմերիկին Հարավային Կովկասում Շվեյցարիայի համագործակցության գրասենյակի աշխատակից է։