Բաչալիաշվիլիի գործով կեղծ ցուցմունք տալու մեղադրանքով ձերբակալված նախկին քննիչն ազատ է արձակվել

«Պակաս ծանր հանցագործություն էր, օրենքը նախատեսում էր ազատ արձակել։ Նա դատապարտված չէ, ունի երեք երեխա։ Նա ընտանիքի միակ կերակրողն է։ Պայմանական է կիրառվել, կալանքի տակ մնալու կարիք չկար»,- ասել է Շուբիթիձեի փաստաբանը։

Ապրիլին Սերգո Շուբիթիձեն հարցազրույց է տվել «Ֆորմուլա» հեռուստաընկերությանը, որտեղ ասել է, որ չի հավատում 23-ամյա Թամար Բաչալիաշվիլիի ինքնասպանության վարկածին և կասկածում է, որ գործը շինծու է։ Որպես այս ենթադրությունը հաստատող հանգամանքներից մեկը՝ նա նշել է Թամար Բաչալիաշվիլիի բջջային հեռախոսը, որը, ըստ նրա, քննիչ Էլգուջա Ապուաշվիլին չկնքված վիճակում է բերել աշխատասենյակ։ Սերգո Շուբիթիձեի խոսքով՝ մահացած կնոջ հեռախոսը մեքենայից հանելուց հետո, հավանաբար, միացրել են այն ու ջնջել դրա մեջ եղած տեղեկությունը մինչև հուլիսի 18-ը։ Էլգուջա Ապուաշվիլին, ով դեռ աշխատում է Թեթրիծղարոյի ոստիկանությունում, «Ֆորմուլա»-ին ասել է, որ «վաղուց գործի հետ կապ չունի և չի հիշում Շուբիթիձեին չկնքված հեռախոս փոխանցելու փաստը։

Հարցազրույց տալուց հետո Սերգո Շուբիթիձեն հրաժարական է տվել Քվեմո Քարթլիի ոստիկանության բաժնի հետաքննչական բաժնի գլխավոր քննիչի պաշտոնից։ Շուտով նրան ձերբակալել են։ Դատախազությունը նրան մեղադրել է կեղծ ցուցմունք տալու մեջ։ Ձերբակալությունից հետո Շուբիթիձեն խոստովանել է հանցանքը։

23-ամյա ծրագրավորող Թամար Բաչալիաշվիլին անհետացել է 2020 թվականի հուլիսի 18-ին։ Հուլիսի 22-ին նրա մարմինը հայտնաբերվել է Թեթրիծղարոյի մունիցիպալիտետի Մածևանի գյուղի մերձակայքում կայանված ավտոմեքենայում։ Գործով նախաքննությունը սկսվել էր ապօրինի ազատությունից զրկելու և ինքնասպանության հասցնելու հոդվածներով, սակայն հինգ ամիս անց այն դադարեցվել էր հանցակազմի նշանների բացակայության պատճառով։ Գլխավոր դատախազությունը հայտարարել է, որ Թամար Բաչալիաշվիլին ինքնասպան է եղել։ Փորձագիտական ​​եզրակացության համաձայն՝ մահվան պատճառը եղել է դեղորայքային թունավորումը։ Ընտանիքն ու փաստաբաններն ի սկզբանե հերքել են ինքնասպանության վարկածը, ենթադրել են, որ Թամար Բաչալիաշվիլիին սպանել են այլ վայրում, իսկ ավելի ուշ մեքենան տեղափոխել են Մածևանիի տարածք։ Բաչալիաշվիլիի ընտանիքը և փաստաբանները կարծում են, որ Սերգո Շուբիթիձեի կողմից հրապարակված տեղեկատվությունը կրկին հետաքննության հիմք է հանդիսանում։