Բացի աշխատավարձի բարձրացումից ու հին գրաֆիկից, բոլոր կետերի շուրջ պայմանավորվել ենք. «Ջորջիան Մանգանեզ»

Հարյուրավոր հանքագործներ տասը օր առաջ գործադուլ են հայտարարել՝ պահանջելով բարելավել աշխատանքային պայմանները, այդ թվում՝ ավելացնել աշխատավարձը 40%-ով և վերադառնալ մինչև փետրվարի 1-ը գործող աշխատանքային գրաֆիկին/պլանին։ Նրանցից տասը հոգի չորրորդ օրն է՝ հացադուլ են անում Ճիաթուրայի մունիցիպալիտետի քաղաքապետարանի շենքի դիմաց բացված վրանում։ Հունիսի 7-ից դադարեցվել է Ճիաթուրայի «Ջորջիան Մանգանեզի» բոլոր օբյեկտների աշխատանքը։

Այսօր մեդիատորի մասնակցությամբ հանդիպում է կայացել ընկերության և գործադուլ անող աշխատակիցների միջև։ Հանդիպումից հետո տարածված հայտարարության մեջ «Ջորջիան Մանգանեզը» հայտնում է իր պատրաստակամությունը շարունակելու միջնորդական գործընթացը և համաձայնում է ստորագրել միջնորդական համաձայնագիր՝ ելնելով ձեռք բերված արդյունքից։

«Ընկերությունն առաջարկում է «Ջորջիան Մանգանեզի» բոլոր աշխատակիցներին, որոնք ցանկանում են սկսել աշխատանքը, անհապաղ բացել ձեռնարկությունները և աշխատողներին տալ 100% աշխատավարձի, իսկ նրանց համար, ովքեր չեն ցանկանում սկսել աշխատանքը մինչև միջնորդական գործընթացի ավարտը,  հատուկ աշխատանքային ռեժիմը երկարաձգել մինչև օգոստոսի 1-ը և փոխհատուցել աշխատավարձի 60%-ը»,- ասվում է «Ջորջիան Մանգանեզի» տարածած հաղորդագրության մեջ։

Ընկերությունը ևս մեկ անգամ բացատրում է փետրվարի 1-ից հատուկ աշխատանքային ռեժիմի անցնելու և աշխատակիցներին աշխատանքային նոր պայմաններ առաջարկելու պատճառները.

«Համաշխարհային ճգնաժամի հետևանքով առաջացած խնդիրների հաղթահարման նպատակով Ճիաթուրայում ժամանակավորապես դադարեցվել են մանգանի հանքաքարի արդյունահանումը, հարստացումը և դրա հետ կապված այլ աշխատանքները և արդեն հինգերորդ ամիսն է 3 382 աշխատակցի վճարվում է աշխատավարձի 60 տոկոսը, ինչը ամսական գերազանցում է 6 մլն լարին։

Ֆեռոհամաձուլվածքների համաշխարհային շուկայում ճգնաժամի ֆոնին ընկերությունը հունիսի 5-ին այսպես կոչված հերթափոխային ռեժիմով աշխատող 720 աշխատակցին առաջարկել է փոխել աշխատանքային պայմանները, որպեսզի ընկերությունը չդադարեցնի իր գործունեությունը և Ճիաթուրայի 3 382 աշխատակիցները չմնան առանց աշխատանքի։

Տարիներ շարունակ 8-ժամյա աշխատանքային գրաֆիկով աշխատում է 2 662 աշխատակից, բացառությամբ այսպես կոչված հերթափոխով աշխատող աշխատողների։ Փոփոխված աշխատանքային պայմանները նշանակում են երկու հերթափոխով 12-ժամյա աշխատանքային պայմաններից անցում եռահերթանոց 8-ժամյա աշխատանքային պայմանների։ Աշխատողների աշխատավարձերը, հանգիստը և աշխատանքային ժամերը մեկ ամսվա կտրվածքով մնում են անփոփոխ։

«Ջորջիան Մանգանեզը» պնդում է, որ նոր աշխատանքային գրաֆիկի նպատակն է աշխատողներին առաջարկել ավելի լավ, հավասար աշխատանքային պայմաններ և բարձրացնել աշխատանքի արտադրողականությունը։

Ճիաթուրայի մանգանի հանքերի շահագործումը դադարեցվել է փետրվարից։ Աշխատակիցների խոսքով՝ մայիսի 1-ից, երբ իրենց կանչել են ու սկսել են փուլ առ փուլ վերականգնել աշխատանքային գործընթացը, ընկերությունը նոր պայմաններ է առաջ քաշել, ինչը նշանակում է նաև աշխատանքային պլանի և ժամանակացույցի փոփոխություն։ Հանքափորների կարծիքով՝ նոր պլանն անհնար է իրականացնել, ինչը նշանակում է, որ իրականում նրանք կատարած աշխատանքով 20 տոկոսով պակաս են վաստակելու։

Հացադուլ հայտարարելուց հետո հանքափորները առաջ են քաշել հետևյալ պահանջները՝ 40%-ով աշխատավարձի բարձրացում, գործող աշխատանքային գրաֆիկի/պլանի անցում մինչև 2023 թվականի փետրվարի 1-ը գործող պլանին, բանկային վարկերի տոկոսների կասեցում և վճարման հետաձգում, մինչ այժմ կուտակվածի վճարումը, ապահովագրության փոփոխություն և պայմանների բարելավում, արձակուրդից օգտվելու հնարավորություն, աշխատողներին աշխատանք սկսելու հնարավորություն, սարքավորումների թարմացում, բարելավում, փոփոխություն, սննդի բարելավում, աշխատակիցներին առողջարանից օգտվելու միջոցների տրամադրում, ինչպես դա արվում էր մինչև փետրվարի 1-ը, բյուլետենի օգտագործման դեպքում դրա 100%-անոց փոխհատուցում, հունիսի 7-ից մինչև ձեռնարկությունում աշխատանքային գործընթացի վերականգնումը բաց թողնված օրերի 100% փոխհատուցում, վերահսկողություն անվտանգության ամենաբարձր մակարդակով, ՍՊԸ-ների չեղարկում և վերամիավորում մեկ ընկերության մեջ, բաց հանքի միջոցով նոր տարածքներ շահագործելիս հաշվի առնել տեղի բնակչության կարծիքը։