Բախմուտի մոտ հինգ վրացիների մահը մեծ վիշտ է մեզ համար. Պատրիարք

«Ձեր ու մեր վիշտը մեծ է դեկտեմբերի 3-ին Բախմուտի մոտ կատաղի ճակատամարտի ժամանակ իրենց կյանքը զոհաբերած հինգ վրացիների՝ Ավթանդիլի, Ռոմեոյի, Ռոմեոյի, Մերաբի և Բադրիի զոհվելու պատճառով։

Մենք աղոթում ենք, որպեսզի Տերը շնորհի արդարներին իրենց անմահ հոգին և շնորհի ձեզ աղոթքի զորություն և անսասան հավատք, որ կյանքը չի ավարտվում մահով, այլ հավերժական, ճշմարիտ կյանքի սկիզբն է, որին մենք բոլորս պետք է պատրաստվենք. - ասվում է պատրիարքի ցավակցական հեռագրում, որը հրապարակել է Պատրիարքարանը։

Դոնեցկի մարզի Բախմուտում դեկտեմբերի 3-ին հինգ վրացի մարտիկ է զոհվել։ Նրանց դիակները դեռևս չի հաջողվում դուրս բերել, քանի որ տարածքը օկուպացված է ռուս զինվորականների կողմից։ Մինչ այդ՝ դեկտեմբերի 1-ին, Կիևում մահացել էր մեկ այլ վրացի մարտիկ՝ 27-ամյա Ջաբա (Ջամբուլատ) Խոփերիան։ Ուկրաինայում Ռուսաստանի սկսած պատերազմն արդեն 34 վրացու կյանք է խլել: Վրաստանի վարչապետ Իրակլի Ղարիբաշվիլին Ուկրաինայում զոհված վրացիներին անվանել է «խեղճ տղաներ» և ասել, որ նրանց «պատերազմի կուսակցությունն» է տանում կռվի։

Նոյեմբերին հայտնի դարձավ, որ Վրաստանի կաթողիկոս-պատրիարք Իլիա Երկրորդը, ծննդյան օրվա առթիվ շնորհավորել է Ռուս ուղղափառ եկեղեցու առաջնորդին, ով նոյեմբերի 20-ին դարձել է 76 տարեկան։ Շնորհավորանքի տեքստը տարածել է Ռուսաստանի պատրիարքարանը։

Ռուս պատրիարքի նկատմամբ Մեծ Բրիտանիայի և Կանադայի կառավարությունները պատժամիջոցներ են կիրառել Ուկրաինայում Ռուսաստանի պատերազմին աջակցելու համար։ Պատժամիջոց էր պատրաստվում կիրառել նաև Եվրոպական միությունը, սակայն, Հունգարիայի հակազդեցության պատճառով, Մոսկվայի և Համայն Ռուսիո 16-րդ պատրիարքի (Վլադիմիր Գունդիաև) անունն ու ազգանունը չի ներառվել պատժամիջոցների վեցերորդ փաթեթում։

Պատրիարք Կիրիլը ճանաչում է Վրաստանի օկուպացված տարածքների, Աբխազիայի և Ցխինվալիի շրջանի այսպես կոչված անկախությունը: