«Բոլոր հրամանները գալիս են Մոսկվայից». Հատուկ նշանակության ջոկատի նախկին բարձրաստիճան պաշտոնյա

Հրատարակությունը հարցազրույց է անցկացրել Իրակլի Շայշմելաշվիլիի հետ, ով դեկտեմբերի 3-ին ՆԳՆ-ի կողմից եվրոպամետ ակցիաները ճնշելու ֆոնին ի նշան բողոքի լքել է Վրաստանի ՆԳՆ հատուկ առաջադրանքների վարչության օպերատիվ պլանավորման բաժնի պետի պաշտոնը, այնուհետև ընտանիքի հետ մեկտեղ լքել երկիրը։

BILD-ի հետ զրույցում ոստիկանության գնդապետն ասում է, որ վրացական «ոստիկանությունն ընդամենը Մոսկվայի գործիքն է»։ Նրա խոսքով՝ Վրաստանի կառավարությունն ու անվտանգության մարմինները գտնվում են Կրեմլի վերահսկողության ներքո։

«Վրաստանում անկախ պետական ​​ծառայություններ չկան։ Ամեն ինչ ուղղակիորեն կապված է Մոսկվայի հետ, և բոլոր հրամանները գալիս են այնտեղից»,- ասում է Շայշմելաշվիլին։

Ինչպես ասում է նա, ՆԳՆ ղեկավարությունը լիովին կոռումպացված է և ապաշնորհ, առանցքային պաշտոնները չեն զբաղեցնում որակավորումների հիման վրա, իսկ ամենակարևոր ուղղությունները վերահսկում են Բիձինա Իվանիշվիլիի հարազատները կամ երբևէ նրա հետ ձեռք սեղմածները։

«Իրավիճակն անտանելի է դարձել»,- BILD-ին ասել է Իրակլի Շայշմելաշվիլին՝ նշելով, որ պաշտոնը լքելուց հետո իր ընտանիքի անդամների հասցեին սպառնալիքներ են սկսվել։ Ինչպես գրում է հրատարակությունը, նա եկել է եզրակացության, որ ընտանիքը պաշտպանելու համար ստիպված է լքել երկիրը։

Հարցազրույցում Իրակլի Շայշմելաշվիլին ասում է, որ իրեն մեղավոր է զգում.

«Ներողություն եմ խնդրում, որ կարծեցի, թե 22 տարի աշխատել եմ Վրաստանի ժողովրդի անվտանգության համար, բայց ի վերջո օլիգարխների բարեկեցությունն ավելի կարևոր դուրս եկավ, քան պետությունը»։

Իրակլի Շայշմելաշվիլին կնոջ և երկու անչափահաս երեխաների հետ Վրաստանից մեկնելուց առաջ ծավալուն հարցազրույց է տվել «Պիրվելի» հեռուստաընկերությանը։ Նրա խոսքով՝ հանրահավաքի մասնակիցներին ծեծի ենթարկելը միտումնավոր է արվում, և նա չի բացառել, որ «Վրացական երազանքի» պատվավոր նախագահ Բիձինա Իվանիշվիլին անձամբ է հրաման տվել։

Վրաստանի ոչ լեգիտիմ վարչապետ Իրակլի Կոբախիձեն Շայշմելաշվիլիին «սովորական շառլատան» է անվանել։ Կոբախիձեի խոսքով՝ նա աշխատել է Հատուկ առաջադրանքների վարչության 17-րդ կառուցվածքային ստորաբաժանումներից մեկում և «բարձր պաշտոնյա չի եղել»։