Բունդեսթագը պահանջում է, որ մինչև ռուսական օրենքի չեղարկումը Վրաստանը ԵՄ-ում առաջխաղացում չունենա

Բանաձևը աջակցում է Վրաստանի անդամակցությանը Եվրամիությանը, սակայն քննադատում է իշխող «Վրացական երազանքի» «ավտորիտար և հակաեվրոպական կուրսը»։ Բանաձևում նշվում է, որ այս ընթացքով երկրի քաղաքական ղեկավարությունը, ի հեճուկս բնակչության ճնշող մեծամասնության ցանկության, միտումնավոր վտանգի տակ է դնում Վրաստանի եվրոպական ապագան։

Բանաձևով Բունդեսթագը կոչ է անում դաշնային կառավարությանը եվրոպական մակարդակով պնդել, որ Վրաստանի հետ հետագա առաջընթաց չի արձանագրվի Եվրամիությանն անդամակցելու գործընթացում, քանի դեռ ուժի մեջ է «Օտարերկրյա ազդեցության թափանցիկության մասին օրենքը» [Ռուսական օրենք]։

Բունդեսթագի պատգամավորներն ասում են, որ նման օրենքը անհամատեղելի է Եվրամիության հիմնարար արժեքների և ժողովրդավարական սկզբունքների հետ։ Նշվում է, որ դա հակասում է Եվրամիության և Վրաստանի կառավարության միջև համաձայնեցված բարեփոխումների ինը առաջնահերթություններից երկուսին. քաղաքացիական հասարակության ազատ գործունեության ապահովումը և Եվրամիության ու նրա արժեքների դեմ ապատեղեկատվության ուղղությամբ պայքարը:

«Այս օրենքը ոգով համապատասխանում է Ռուսաստանի «Օտարերկրյա գործակալների մասին» օրենքին»,- ասում են Բունդեսթագի պատգամավորները։

Բանաձևով քննադատության է ենթարկվում նաև «Վրացական երազանքի» ընդունած հակաԼԳԲՏ օրենքը։ Բունդեսթագը դիմում է դաշնային կառավարությանը՝ կոչ անելով «Վրացական երազանքի» խորհրդարանական մեծամասնությանը չեղյալ համարել նշված օրենսդրությունը, քանի որ այն, ինչպես «Վրացական երազանքի» առաջարկած սահմանադրական փոփոխությունները, ոչ միայն հարձակում է ԼԳԲՏՔԻԱ+ համայնքի վրա, այլ նաև հարձակում մարդու իրավունքների, խոսքի ազատության և ազատ քաղաքացիական հասարակության վրա։

Բանաձևի համաձայն՝ Գերմանիայի կառավարությունը պետք է կոչ անի Վրաստանի կառավարությանը՝ «դադարեցնել ոստիկանության և դատախազության կողմից խաղաղ ցուցարարների անօրինական հետապնդումները»։

Բանաձևում ասվում է, որ Վրաստանի հետ ապագա հարաբերությունները պետք է կախված լինեն ազատ և արդար խորհրդարանական ընտրությունների անցկացումից։

«Վրաստանի համար գալիք խորհրդարանական ընտրությունները կդառնան շրջադարձային որոշում՝ կապված երկրի ժողովրդավարական և իրավական պետության և եվրոպական կուրսի հետ»։

Բունդեսթագի պատգամավորները կարծում են, որ հարձակումները անկախ դիտորդական կազմակերպությունների վրա, ռուսական օրենքի բացասական ազդեցությունը նրանց գործունեության վրա, Ընտրական օրենսգրքի վերջին փոփոխությունները, որոնք ուժեղացնում են իշխող կուսակցության ազդեցությունը Կենտրոնական վերստուգիչ հանձնաժողովի վրա, ինչպես նաև վարչական ռեսուրսի մոբիլիզացումը՝ աջակցելու «Վրացական երազանքի» քաղաքականությանը, կասկածի տակ կարող է դնել խորհրդարանական ընտրությունների հավասարությունն ու ազատությունը։

Բանաձևում կարդում ենք, որ «Վրացական երազանքի» ղեկավարությունն իր շարունակական ավտորիտար գործողություններով փորձում է երկրում վախի մթնոլորտ ներշնչել՝ հասարակությունը բաժանելով հայրենասերների ու թշնամիների/դավաճանների։

«Վրաստանի վարչապետ Իրակլի Կոբախիձեի վերջին հայտարարությունը, թե նա ցանկանում է խորհրդարանական ընտրություններից հետո արգելել հիմնական ընդդիմադիր կուսակցություններին, նույնպես բացարձակապես անընդունելի է և անհամատեղելի ժողովրդավարության եվրոպական ըմբռնման հետ»,- ասվում է բանաձևում։

Բանաձևում խոսվում է նաև նպատակային պատժամիջոցների մասին. խորհրդարանը կառավարությանը կոչ է անում վերահսկել Վրաստանի ներկա իրավիճակը՝ բացահայտելու այն փաստերը, որոնք կարող են հանգեցնել նման պատժամիջոցների։

Միևնույն ժամանակ, Բունդեսթագը կոչ է անում դաշնային կառավարությանը աջակցել Վրաստանի բնակչության համար առանց վիզայի ռեժիմի պահպանմանը եվրոպական մակարդակով, չնայած կառավարության հետընթացին ժողովրդավարության ոլորտում, քանի որ առանց վիզայի ռեժիմի կասեցումը կազդի ողջ Վրաստանի բնակչությանը և եվրոպամետ ուժերին։

Բունդեսթագը կոչ է անում դաշնային կառավարությանը կոչ անել Ռուսաստանին լիովին հարգել Վրաստանի տարածքային ամբողջականությունը և խստորեն դատապարտել Ռուսաստանի ցանկացած ազդեցություն այն տարածքների վրա, որոնք դե ֆակտո վերահսկվում են ռուսական զորքերի կողմից, ինչպես նաև Վրաստանի հետագա ապակայունացման փորձերը:

Բանաձևին դեմ են քվեարկել «Այլընտրանք Գերմանիայի համար» խմբակցությունը և «Սարա Վագենկնեխտ միություն» խումբը, իսկ ձախակողմյանները ձեռնպահ են մնացել։

«Այլընտրանք Գերմանիայի համարը» կոչ է անում դաշնային կառավարությանը ազդել իր գործընկերների վրա՝ «դադարեցնելու Վրաստանում կառավարության փոփոխության (ռեժիմի փոփոխության) ցանկացած փորձ»: Խմբակցության հայտարարության մեջ ասվում է, որ պետք է խուսափել «ներքին գործերին անընդունելի միջամտություններից, ինչպիսիք են ժողովրդավարության և հասարակական կազմակերպությունների հավանական խթանումը»: