Բժանիան ռուսական անձնագրեր ունեցող աբխազներին կոչ է արել ընտրություններում քվեարկել Պուտինի օգտին

Մարտի 15-17-ը Վրաստանի օկուպացված տարածքներում նույնպես կանցկացվեն Ռուսաստանի Դաշնության նախագահի ընտրություններ։ Ցխինվալիի շրջանում քվեարկության համար կբացվի 12, Աբխազիայում՝ 30 ընտրատեղամաս։

«Ձեզնից յուրաքանչյուրը, ով ունի ռուսական անձնագիր, կանգնած է կարևոր ընտրության առաջ, և այդ ընտրությունը կազդի ոչ միայն Ռուսաստանի, այլև մեր ընդհանուր ապագայի վրա։ Մենք պետք է աջակցենք նրանց, ովքեր աջակցել են մեզ, ովքեր նպաստել են մեր անկախության զարգացմանն ու բարգավաճմանը։ Սա հնարավորություն է ցույց տալու մեր գնահատանքն ու հարգանքը։ Խոսքն, իհարկե, ՌԴ նախագահ Վլադիմիր Պուտինի մասին է, ում անձնական ներդրումն անկախ ու ինքնիշխան Աբխազիայի զարգացման գործում անգնահատելի է։ 2024 թվականի մարտի 17-ին մենք հնարավորություն կունենանք աջակցել Ռուսաստանին, աջակցել Վլադիմիր Պուտինին»,- ասել է դե ֆակտո նախագահը։

Ասլան Բժանիայի խոսքով՝ Ռուսաստանը Աբխազիայի լավագույն բարեկամն է, հարևանը և միակ պատուհանը դեպի աշխարհ։ «Ռուսաստանի Դաշնությունն առաջինն էր, որ ճանաչեց մեր ինքնորոշման իրավունքը։ Մենք ուզում ենք ապրել մեր սեփական տանը և խոսել մեր լեզվով, զարգացնել մեր մշակույթն ու տնտեսությունը։ Մեր իրավունքն է լինել այնպիսին, ինչպիսին կանք»,- նշել է նա։

Բժանիան շնորհակալություն է հայտնել Ռուսաստանին «վերջին տասնամյակներում Աբխազիայի բնակչությանը ցուցաբերած աջակցության և օգնության համար»։

Ռուսաստանի նախագահի թեկնածուներն են գործող նախագահ Վլադիմիր Պուտինը և նրա երեք «հակառակորդները»՝ Նիկոլայ Խարիտոնովը (Ռուսաստանի Կոմունիստական ​​կուսակցություն), Լեոնիդ Սլուցկին (Ռուսաստանի Լիբերալ-դեոկրատական ​​կուսակցություն) և Վլադիսլավ Դավանկովը (Նոր ժողովուրդ կուսակցություն): Պուտինը հինգերորդ անգամ է հավակնում Ռուսաստանի նախագահի պաշտոնին։ Գործող օրենսդրությունը նրան թույլ է տալիս այս պաշտոնում մնալ մինչև 2036 թվականը։