Ծալկայում անտուն շանը կրակող տղամարդը ձերբակալվել է

Մեղադրյալը ձերբակալվել է հունիսի 15-ին այն բանից հետո, երբ սոցցանցերում տարածվել է տեսանյութ, որտեղ երևում է կենդանու նկատմամբ դաժան վերաբերմունքը։ «Անանուն աղբյուրն ինձ տեսանյութ է տրամադրել, որտեղ երևում է, թե ինչպես են Ծալկայում լուսադեմին սպանում անօթևան շներին»,- ասվում է տեսանյութի նկարագրության մեջ։

Տեսանկարահանող տեսախցիկի տեսագրության մեջ երևում է մի տղամարդ, ով նախ մեքենայից կրակում է շենքի դիմաց պառկած շանը, իսկ հետո, երբ վիրավոր կենդանին փորձում է փախչել, դուրս է գալիս մեքենայից ու կրկին կրակում։

Օրեր առաջ փողոցում շան սպանության դեպք է գրանցվել նաև Թբիլիսիում։ Ականատեսների վկայությամբ՝ մայթեզրին գտնվող կենդանուն կրակել են հրազենից։ Այս փաստով ՆԳՆ-ն հետաքննություն է սկսել կենդանիների նկատմամբ դաժան վերաբերմունքի հոդվածով։

Վրաստանի քրեական օրենսգրքի համաձայն՝ կենդանուն խոշտանգելը կամ դաժան վերաբերմունքը պատժվում է հասարակական աշխատանքով՝ 120-ից 240 ժամ ժամկետով, տնային կալանքով՝ 6 ամսից մինչև 1 տարի ժամկետով, տուգանքով կամ ազատազրկմամբ՝ առավելագույնը 1 տարի ժամկետով։ Նույն արարքը, որը կատարվել է խմբով, բազմիցս կամ անչափահասի ներկայությամբ՝ պատժվում է հասարակական աշխատանքով՝ 200-ից 400 ժամ ժամկետով, տնային կալանքով՝ մեկից երկու տարի ժամկետով, տուգանքով կամ ազատազրկմամբ՝ մինչև 3 տարի։