Ցուցարարներին կարգելվի դիմակ կրել, պիրոտեխնիկա և լազերներ ունենալ. տուգանքը կկազմի 2000 լարի

Օրինագծի հեղինակներն են «Վրացական երազանքի» անդամներ Ռատի Իոնաթամիշվիլին, Ալեքսանդր Տաբատաձեն, Թենգիզ Շարմանաշվիլին, Նինո Ծիլոսանին, Ալուդա Ղուդուշաուրին, Իրակլի Շաթակիշվիլին և Գուրամ Մաճարաշվիլին։

«Հավաքների և դրսևորումների մասին» օրենքում փոփոխությունների նախնական տարբերակը վերաբերում էր միայն պիրոտեխնիկական արտադրանքին, սակայն իրավական հարցերի հանձնաժողովի նիստում քննարկումից հետո օրենքի նախագիծը ձևակերպվել է հետևյալ կերպ.

«Հավաքի կամ ցույցի մասնակիցներին արգելվում է.

«ա) ունենալ հրազեն, պայթուցիկ, դյուրավառ, ռադիոակտիվ նյութեր, սառը զենքեր կամ պիրոտեխնիկական իրեր,

ա¹) ունենալ լազերային և (կամ) սուր ճառագայթում ունեցող ցանկացած միջոց, որի օգտագործումը կարող է խանգարել պետական ​​գերատեսչությունների ներկայացուցիչների գործունեությանը և (կամ) նրանց տրամադրության տակ գտնվող տեխնիկական միջոցների պատշաճ աշխատանքին,

ա²) դեմքը դիմակով կամ այլ միջոցներով փակել։

Օրենքի նախագծի համաձայն՝ հավաքին կամ ցույցին մասնակցող անձանց ցուցակը, ովքեր իրենց մասնագիտական ​​գործունեության բերումով կարող են փակել դեմքը, ինչպես նաև այդ անձանց համապատասխան թույլտվություն տալու կանոններն ու պայմանները սահմանում է ներքին գործերի նախարարը։ 

Իրավական հարցերի հանձնաժողովի նիստում հանրային պաշտպանի առաջին տեղակալը նշել է, որ դիմակով հանրահավաքի գալը արտահայտվելու ձև է. «Գլխավորն այն է, որ անձը այնտեղ գտնվի խաղաղ պայմաններում և մտադրություն չունենա քողարկել իր հանցավոր գործունեությունը։ Սկզբունքների մակարդակով չափորոշիչը ձեզ հետ կիսեցի, թե ինչ են ասում միջազգային չափանիշները մարդու իրավունքների պաշտպանության առումով: Մարտահրավերն այն է, որ ձևակերպումը պետք է լինի այնպիսին, որ հավասարակշռությունը պահպանվի»,- ասել է Թամար Գվարամաձեն։ Ըստ նրա՝ հանրային պաշտպանն այս հարցում մեկնաբանություններ կունենա։

«Վրացական երազանքը» արագացված կարգով քննարկում է օրենսդրական փոփոխությունները և նախատեսում է դրանք ընդունել բոլոր երեք ընթերցմամբ մինչև աշնանային նստաշրջանի ավարտը։ Նիստը կփակվի ուրբաթ՝ դեկտեմբերի 13-ին։

Նախագահ Սալոմե Զուրաբիշվիլին,հավանաբար, չի ստորագրի «Վրացական երազանքի» ընդունած օրինագիծը։ Նրա գնահատմամբ՝ «ռեժիմն» իրեն է հարմարեցնում օրենքները։

«Ոչինչ չեն ասում այն մասին, որ իրենց «տիտուշկաներին» այլևս չի թույլատրվում կրել այդ դիմակները կամ պարտավորվում են, ինչպես ընդունված է համաշխարհային չափանիշներով, կրել նույնականացման նշաններ»,- ասել է նախագահը։

Հավանաբար նոր կանոնակարգերն ուժի մեջ կմտնեն հրապարակվելուց անմիջապես հետո՝ ոչ լեգիտիմ խորհրդարանի նախագահ Շալվա Պապուաշվիլիի ստորագրությամբ։