Դա կարող է վնասել շատ լավ գործերի, որոնք մենք անում ենք Վրաստանում․ Քլեյթոնը՝ ռուսական օրենքի մասին

«Կան բազմաթիվ մեկնաբանություններ Վրաստանի գործընկերների կողմից, որոնք այս 30 տարիների ընթացքում շատ բան են արել Վրաստանի ապագայի համար, որոնք դեմ են այս օրենքի ընդունմանը և այս տեսքով արտաքին ազդեցության հայեցակարգի օրինականացմանը։ Այստեղ կարող եմ կրկնել այն, ինչ օրեր առաջ ասաց Ժոզեֆ Բորելը, որ այս օրենքի պայմաններում Վրաստանի՝ Եվրամիությանն անդամակցելու հեռանկարը դե ֆակտո սառեցված է։ Այսպիսով, եթե Վրաստանը ցանկանում է առաջ շարժվել, ապա պետք է մեկ այլ հայացք նետի այս օրենքին և որոշի, թե ինչ է անում իրականում առաջ գնալու համար: Այս պահին, կարծում եմ, ԵՄ-ն բավականին հստակ է։ Այս օրենքը չի համապատասխանում ԵՄ անդամակցության պահանջներին։ ԵՄ անդամ երկրները պետք է ավելի շատ խոսեն այս մասին։

Ես ձեզ կասեմ, թե ինչ է նշանակում այս օրենքը մեր դեսպանության գործունեության տեսանկյունից։ Միգուցե այս օրենքը էականորեն վնասի շատ լավ բաների, որ մենք անում ենք Վրաստանում։ Մեծ մասերից մեկը, որտեղ մենք աջակցում ենք Վրաստանին, Աբխազիայի և Հարավային Օսիայի հետ հաշտեցման գործընթացն է։

Այս աջակցությունը տարբեր ձևեր ունի: Գործի մի մասն ընթանում է ԵԱՀԿ-ում՝ Վրաստանի ինքնիշխանության պաշտպանության համար։ ՄԱԿ-ը ևս մեկ անգամ Մեծ Բրիտանիայի հետ բանաձև ապահովեց տեղահանվածների վերադարձի վերաբերյալ: Քաղաքական առումով մեր աջակցությունն ու դիրքորոշումը միանգամայն պարզ է, բայց ֆինանսավորման մասով համագործակցում ենք համայնքային կազմակերպությունների հետ, այս օրենքով նրանք պետք է պիտակավորվեն որպես օտարերկրյա գործակալներ։ Կարծում եմ, որ դա ճիշտ չէ, նրանք աշխատում են աջակցել Վրաստանի կառավարության հաշտեցման քաղաքականությանը։ Այս օրենքի ռիսկը կայանում է նրանում, որ նրանք կարող են խարանվել, և այս աշխատանքը դադարեցվի»,- ասել է Մարկ Քլեյթոնը BMG-ին տված հարցազրույցում։

Դիվանագետը նշել է, որ Վրաստանի քաղաքացիական սեկտորը «արդեն շատ թափանցիկ է», և պետությունը մանրամասն հասանելիություն ունի նրանց դրամական հոսքերին։

Վրաստանում զարգացումներին հետևում են նաև բրիտանացի ներդրողները։ Ըստ Մարկ Քլեյթոնի, այն հեռանկարը, որ վրացիները կարող են պատժամիջոցների ենթարկվել ռուսական օրենքի պատճառով, ազդում է նրանց վրա, բայց ավելի շատ, քան պատժամիջոցները, նրանք ավելի նյարդայնացած են «վախեցնելու կազմակերպված արշավից»։ «Նրանք նայում են միջազգային մամուլին, The Guardian, The Economist: Այսօր Վրաստանն այնքան էլ լավ տեսք չունի միջազգային լրատվամիջոցներում։ Նրանք կարդում են անկայունության, բռնության, քաղաքացիական հասարակության ներկայացուցիչներին ահաբեկելու մասին։ Արդյունքում նրանք զգույշ են իրենց ներդրումների նկատմամբ»,- նշել է դեսպանը։

Մայիսի վերջին «Վրացական երազանքի» խորհրդարանական մեծամասնությունը՝ 83 պատգամավորի աջակցությամբ, վերջնական ընդունեց այսպես կոչված «օտարերկրյա գործակալների» մասին ռուսական օրենքը։ Իշխող կուսակցությունը հաշվի չառավ ռուսական օրենքը հետ կանչելու Վենետիկի հանձնաժողովի խիստ հանձնարարականը, ինչպես նաև միջազգային գործընկերների նախազգուշացումները, որ նման օրենսդրությունը կվնասի Վրաստանի եվրաատլանտյան ինտեգրման գործընթացին։