Դատավոր Գիորգի Միքաուտաձեի տեղեկանքը մոր դրամական նվերի ծագման մասին կասկածելի է

Դատավորի ունեցվածքի հայտարարագրերից պարզ է դառնում, որ 2022 թվականին մայրը՝ Դարեջան Թավարթքիլաձեն, նրան է նվիրել 100 000 ԱՄՆ դոլար, իսկ 2023 թվականին՝ 50 000 ԱՄՆ դոլար։

Դատավորը ներկայացրել է 2023 թվականի ապրիլին «Բախտրիոնի» ԲԲԸ-ի կողմից տրված տեղեկանքը, ըստ որի՝ Դարեջան Թավարթքիլաձեն ընկերությունում աշխատում է 2019 թվականի փետրվարի 4-ից և ամսվա ընթացքում ստանում է 5005 լարի որպես աշխատավարձ, իսկ 17 057 լարի՝ որպես շահաբաժին։

«Բախտրիոնի» ԲԲԸ-ի հիմնական գործունեությունը իրեն պատկանող անշարժ գույքի վարձակալությունն է։ Ըստ հանրային ռեգիստրի քաղվածքի՝ Դարեջան Թավարթքիլաձեն ընկերության վերահսկիչ խորհրդի անդամ է։

«Թրանսփարենսի Ինթերնեշնլ-Վրաստան»-ի փոխանցմամբ՝ դատավորը կասկածելի զեկույց է ներկայացրել մոր դրամական նվերի ծագման վերաբերյալ։ Կազմակերպությունն ուսումնասիրել է «Բախտրիոնի» 2019-2022 թվականների ֆինանսական հաշվետվությունները և եզրակացրել, որ Դարեջան Թավարթքիլաձեն շահաբաժնի տեսքով պետք է ստանար ամսական 6900 լարի՝ 2,5 անգամ պակաս։

«Եվրահանձնաժողովի հանձնարարականի համաձայն՝ Գերագույն դատարանի դատավոր Գիորգի Միքաուտաձեն պետք է ենթարկվի ազնվության ստուգման մեխանիզմին, որը նախապայմաններից է Եվրամիությանն անդամակցելու շուրջ բանակցություններ սկսելու համար։ Միքաուտաձեն, դատարանի և կառավարության այլ ազդեցիկ դատավորների հետ միասին, դեմ է այդ մեխանիզմի ներդրմանը»,- ասում են «Թրանսփարենսի Ինթերնեշնլ-Վրաստան»-ից։

Գիորգի Միքաուտաձեն Վրաստանի Գերագույն դատարանի նախագահի տեղակալն է և քաղաքացիական գործերի պալատի նախագահը։ Գույքի հայտարարագրի համաձայն՝ 2023 թվականին նա որպես աշխատավարձ ստացել է 134 911 լարի, իսկ կնոջ՝ Թբիլիսիի քաղաքային դատարանի դատավոր Մայա Կվիրիկաշվիլիի աշխատավարձը կազմել է 85 513 լարի։

Գերագույն դատարանի դատավորը Ծավկիսի գյուղում 2500 քմ հողամասում, որը ձեռք է բերել 2020 թվականին 90 000 ԱՄՆ դոլարով, առանձնատուն է կառուցում։ 2023 թվականին շինարարության վրա ծախսել է 307 000 լարի, իսկ 2022 թվականին՝ 403 500 լարի։