Դավիթ Քացարավայի խոսքով՝«Ալտ-ինֆո»-ի անդամները հարձակվել են իր կնոջ և երեխայի վրա

Տեսանյութում երևում է, որ կոտրված է մեքենայի ապակին, վնասված են նաև դռան բռնակը և առջևի հատվածը։

«Հարձակվել են մեքենայի վրա, բեյսբոլի մահակներով հարվածել են, փորձել են բացել դուռը։ Բարեբախտաբար, մեքենայի դռները կողպված է եղել։ Հատկապես փորձել են բացել այն կողմը, որտեղ եղել է իմ 13-ամյա տղան և պատրաստվում են նրան դուրս քաշել։ Սա բռնի խմբավորում է։ Հանցագործները հստակ գիտեին, որ մեքենան վարում է կինս»,- պատմում է Քացարավան։

Նրա տեղեկություններով՝ երեկ երեկոյան հարձակմանը նախորդել է իր կնոջ արտահայտած բողոքը «Ալտ-ինֆո»-ի գրասենյակի մոտ. «Մի քանի օր առաջ կինս, անցնելով նրանց գրասենյակի մոտով, ի նշան բողոքի, մեքենայով ազդանշան է տվել և սոցցանցում գրել, որ նա միշտ դա կանի: Դրան հաջորդել է բանավեջ «Ալտ-ինֆո»-ի անդամների հետ: Նրան էլի էին հանդիպել։ Կինս միշտ նույն տեղից է վառելիք լցնում և կարծես թե պատրաստվել էին երեկվա հարձակմանը»։

Դավիթ Քացարավան ակնկալում է, որ ՆԳՆ-ն մինչև մարտի 14-ը կձերբակալի և կդատապարտի հարձակման բոլոր մասնակիցներին, հակառակ դեպքում, ինչպես ինքն է ասում, իրեն իրավունք է վերապահում գործելու իր հայեցողությամբ։

Երեկ երեկոյան ոստիկանությունը հարցաքննել է Քացարավայի կնոջը և «Ալտ-ինֆո»-ի անդամներին։

ՆԳ նախարարության տեղեկատվության համաձայն՝ հետաքննությունը Քրեական օրենսգրքի 187-րդ հոդվածի հատկանիշներով է ընթանում, որը նշանակում է ուրիշի գույքը վնասել կամ ոչնչացնել։