დავით ქაცარავა ამბობს, რომ მის ცოლ-შვილს თავს „ალტ-ინფოს“ წევრები დაესხნენ

 გავრცელებული ვიდეოკადრებიდან ჩანს, რომ ავტომობილს ჩამსხვრეული აქვს მინა, დაზიანებულია კარის სახელური და წინა ნაწილიც.

„მივარდნენ მანქანას, დალეწეს ბეისბოლის ბიტებით, ცდილობდნენ კარის გაღებას. საბედნიეროდ, მანქანა შიგნიდან იყო ჩაკეტილი. განსაკუთრებით იმ მხარის გამონგრევას ცდილობდნენ, სადაც ჩემი 13 წლის შვილი იყო და მის გადმოთრევას გეგმავდნენ. ეს არის ძალადობრივი ჯგუფი. მოძალადეებმა ზუსტად იცოდნენ, რომ ავტომობილს ჩემი მეუღლე მართავდა“, - ამბობს ქაცარავა.

მისივე ინფორმაციით, წუხელ მომხდარ თავდასხმას წინ უძღოდა მისი მეუღლის მიერ გამოხატული პროტესტი „ალტ-ინფოს“ ოფისთან: „რამდენიმე დღით ადრე, ჩემმა მეუღლემ, მათ ოფისთან გავლისას, პროტესტის ნიშნად დაასიგნალა და სოციალურ ქსელში დაწერა, რომ ყოველთვის ასე მოიქცეოდა. ამას „ალტ-ინფოს“ ჯგუფებში გარჩევა მოჰყვა. ერთხელ გამოეკიდნენ კიდეც. ჩემი მეუღლე ყოველთვის იმ ადგილას ასხამს საწვავს და როგორც ჩანს, მომზადებულები იყვნენ წუხანდელი თავდასხმისთვის“.

დავით ქაცარავა თავდასხმის ყველა მონაწილის დაკავებასა და პასუხისგებაში მიცემას შინაგან საქმეთა სამინისტროსგან 14 მარტამდე ელოდება, წინააღმდეგ შემთხვევაში, როგორც ის ამბობს, იტოვებს უფლებას, საკუთარი შეხედულებისამებრ იმოქმედოს.

პოლიციამ ქაცარავას მეუღლე და „ალტ-ინფოს“ წევრები წუხელ გამოკითხა.

შინაგან საქმეთა სამინისტროს ინფორმაციით, გამოძიება სისხლის სამართლის კოდექსის 187-ე მუხლით, რაც სხვისი ნივთის დაზიანებას ან განადგურებას გულისხმობს.