Լրահոս

Տատուաշվիլիի խոսքով՝ նա նկատել է, որ իրեն հետապնդում են, և ենթադրում է, որ հարձակվողները Զուրաբ Օքմելաշվիլին և Կոբա Մենաբդիշվիլին են, որոնք կապված են «Վրացական երազանքի» հետ, և որոնց իշխող կուսակցությունն օգտագործում է ընտրությունների ժամանակ մարդկանց վախեցնելու համար։

«Տեսանկարահանող սարքը ֆիքսել է, թե ինչպես են արգելափակել մեքենան և ինչպես են դուրս եկել։ Ես կանգ չառա։ Մեկ փամփուշտ դիպել է մեքենայի անվադողին ու ծակել այն»,- ասել է Տատուաշվիլին «Ֆորմուլա»-ին։

Փաստի առթիվ ՆԳՆ-ն հետաքննություն է սկսել քրեական օրենսգրքի 236-րդ և 187-րդ հոդվածներով, որոնք վերաբերում են ուրիշի գույքը վնասելուն և հրազենի ապօրինի գնելուն-պահելուն։

Գիորգի Տատուաշվիլին Դմանիսիի մունիցիպալիտետի քաղաքապետ է ընտրվել 2017 թվականին։ Մինչ այդ նա «Նյու Հոսփիթալսի» իրավաբանական բաժնի իրավաբան է եղել։ 2020 թվականին «Վրացական երազանքը» հեռացրել է նրան կուսակցությունից և որպես պատճառ նշել նրա «աջակցությունը մրցակից թեկնածուի նախընտրական արշավին»։ 2021 թվականին Տատուաշվիլին ինքնակառավարման ընտրություններում առաջադրվել է որպես «Ազգային շարժում» կուսակցության թեկնածու, սակայն «Վրացական երազանքի» թեկնածու Կոբա Մուրադաշվիլին հաղթել է նրան՝ 4,16 տոկոս առավելությամբ։ Ձայները բաշխվել են հետևյալ կերպ՝ Կոբա Մուրադաշվիլի (Վրացական երազանք - N41)՝ 52,08%, Գիորգի Տատուաշվիլի (Ազգային շարժում - N5)՝ 47,92%։

Տատուաշվիլիի վրա հարձակման առնչությամբ «Միացյալ ազգային շարժումը» դիմել է Վրաստանում հավատարմագրված դիվանագիտական ​​կորպուսին։

«Գիորգին 2021-ի ընտրություններում փաստացի հաղթանակած մարդ է, իսկ 2024-ի ընտրություններից առաջ փորձ է արվում նրան որպես օրինակ չեզոքացնել։ Դիմում ենք Վրաստանում հավատարմագրված դիվանագիտական ​​կորպուսին, Վրաստանում ժողովրդավարության և մարդու իրավունքների ոլորտում աշխատող հասարակական կազմակերպություններին, որպեսզի այս բացահայտ քաղաքական վենդետան համարեն որպես ռուսական հանցավոր ռեժիմի՝ 2024 թվականին նախատեսված խորհրդարանական ընտրությունների նախընտրական բռնի քարոզարշավի մաս »,- ասված է հայտարարության մեջ։