ԵԱՀԿ Խորհրդարանական վեհաժողովի նախագահը հետաձգել է իր այցը Վրաստան

«Ես որոշեցի հետաձգել իմ այցը Վրաստան այնքան ժամանակ, երբ առավել արդյունավետ կլինի ԵԱՀԿ Խորհրդարանական վեհաժողովի ներգրավումը։ Մենք պատրաստ ենք լսել բոլորին և օգնություն առաջարկել ԵԱՀԿ/ԺՀՄԻԳ-ի նախընտրական առաջարկությունների իրականացմանը»,- գրել է Կաուման X հարթակում։

Պիա Կաուման պատրաստվում էր Թբիլիսի ժամանել Խորհրդարանական վեհաժողովի փոխնախագահ Լուի Գրաչայի հետ։ Այցի մասին հայտնի դարձավ երեկ՝ հունվարի 5-ին, որից հետո խորհրդարանական ընտրություններում շեմը հաղթահարած ընդդիմադիր կուսակցությունները նամակով դիմել են Կաումային և կոչ արել վերանայել որոշումը՝ բացատրելով, որ «Վրացական երազանքն» այս քայլը կօգտագործի քարոզչական նպատակներով։

«Ինքնակոչ ռեժիմի նպատակը միջազգային ճանաչում ձեռք բերելն է։ Այս պայմաններում այցի հետաձգումը լավագույն որոշումը կլինի այնքան ժամանակ, քանի դեռ ռեժիմը չի պարտավորվել նոր ընտրություններ նշանակել և ազատ արձակել քաղբանտարկյալներին»,- ասվում է «Ուժեղ Վրաստանի», «Հանուն փոփոխությունների կոալիցիայի» և «Միասնություն ազգային շարժման» կոչում։

Նախկին վարչապետ, «Հանուն Վրաստանի» կուսակցության նախագահ Գիորգի Գախարիան գրել է, որ «ռեժիմի» հետ ցանկացած հարաբերություն պետք է հիմնված լինի հստակ ու անսասան պայմանների, առաջին հերթին՝ քաղբանտարկյալների ազատ արձակման վրա։

«Ավելին, երկխոսությունը պետք է անդրադառնա միայն նոր, ազատ և արդար ընտրությունների հրատապ անհրաժեշտությանը: Առանց այդ նախադրյալների՝ ռեժիմի հետ ցանկացած հարաբերություն վտանգում է լեգիտիմացնել նրա ռեպրեսիվ գործողությունները և էլ ավելի ամրապնդել ավտորիտարիզմը»,- ասել է Գախարիան։

Վրաստանի հինգերորդ նախագահ Սալոմե Զուրաբիշվիլիի կարծիքով, ԵԱՀԿ Խորհրդարանական վեհաժողովի նախագահի այցի ժամանակահատվածը պատշաճ չէր ընտրվել, և դա չէր նպաստի երկրում ստեղծված ճգնաժամի լուծմանը։

ԱՄՆ Հելսինկյան հանձնաժողովի նախագահ Ջո Ուիլսոնը նույնպես նամակ է գրել Պիա Կաումային։ Ըստ հանրապետական ​​կոնգրեսականի՝ «Վրացական երազանքը» ԵԱՀԿ Խորհրդարանական վեհաժողովի ցանկացած պաշտոնական մասնակցություն կօգտագործեր որպես «ավտորիտար յուրացումը լեգիտիմացնելու» միջոց։

«Ցավոք, մենք վերջերս ականատես եղանք այս դինամիկային, երբ կուսակցությունը օգտագործեց ԵԱՀԿ Խորհրդարանական վեհաժողովի փոխնախագահ Պասկալ Ալիզարի նամակը Վրաստանի կառավարությանը ԺՀՄԻԳ-ի նախընտրական առաջարկությունների մասին՝ կեղծ պնդելու համար, որ ԵԱՀԿ-ն աջակցել է ընտրությունների արդյունքներին:

Չնայած այս այցը կազմակերպելու ձեր վեհ մտադրություններին, ես վախենում եմ, որ անխուսափելի է, որ «Վրացական երազանքը» սխալ կհասկանա ձեր ներգրավվածությունը որպես միջազգային խորհրդանշական հավանություն: Ուստի հարգանքով խնդրում եմ, որ վերանայեք ձեր ծրագրած այցը»,- ասված է Ջո Ուիլսոնի՝ հունվարի 3-ի նամակում։

Պիա Կաումայի որոշումը քննադատել են լատվիացի և լիտվացի պատգամավորներ Ռիհարդս Կոլսը և Ռասա Յուկնևիչենեն, ինչպես նաև Գերմանիայի խորհրդարանի արտաքին հարաբերությունների հանձնաժողովի նախագահ Միխայել Ռոթը։