ԵՄ ԱԳ նախարարները հոկտեմբերի 26-ի ընտրություններն ազատ չեն համարում

Էլինա Վալտոնեն, Ֆինլանդիայի արտաքին գործերի նախարար. «Ժողովրդավարությունը հիմնված է ազատ ընտրությունների վրա: Ինձ անհանգստացնում է Վրաստանի ընտրությունների վերաբերյալ ԵԱՀԿ/ԺՀՄԻԳ զեկույցը։ Բազմաթիվ խախտումներ, ընտրողների ճնշումներ և անհավասար ընտրական միջավայր։ Ընտրությունների արդարության վերաբերյալ կասկածները խարխլում են վրաց ժողովրդի իրավունքները»։

Էսպեն Բարտ Էյդե, Նորվեգիայի արտաքին գործերի նախարար. «Ինձ անհանգստացնում է Վրաստանում կայացած ընտրությունների վերաբերյալ ԵԱՀԿ/ԺՀՄԻԳ զեկույցը, որը ցույց է տալիս բազմաթիվ խախտումներ, ընտրողների ճնշումներ, ահաբեկումներ և անհավասար ընտրական միջավայր։ Ընտրական գործընթացի արդարության հետ կապված անորոշությունները նվազեցնում են վստահությունն անցկացված ընտրությունների նկատմամբ։ Պետք է լուծել այս անորոշությունները»։

Դանիայի արտաքին գործերի նախարար Լարս Լոկ Ռասմուսեն. «Դանիան պաշտպանում է Վրաստանի ժողովրդի ժողովրդավարական իրավունքը՝ ունենալ ազատ և արդար ընտրություններ։ Ինձ անհանգստացնում են ԵԱՀԿ/ԺՀՄԻԳ դիտորդների հայտարարություններն այն մասին, որ ընտրություններն անցել են անհավասար միջավայրով, ճնշումներով և լարվածությամբ։ Մենք շատ լուրջ ենք վերաբերվում այս բացահայտումներին»:

Գաբրիելիուս Լանդսբերգիս, Լիտվայի արտաքին գործերի նախարար. «Ընտրությունները պետք է հիմնված լինեն ազատության և արդարության վրա։ Ես շատ լուրջ եմ վերաբերվում ցանկացած ընտրության ժամանակ խախտումների վերաբերյալ մեղադրանքներին և ուշադիր հետևելու եմ Վրաստանում իրավիճակի զարգացմանը»։

Մարգուս Ցահկնա, Էստոնիայի արտաքին գործերի նախարար. «Ընտրությունների դիտորդների զեկույցները և նախագահ Սալոմե Զուրաբիշվիլիի հայտարարությունը անհնարին են դարձնում այս ընտրությունները համարել ազատ և արդար։ Ոչ ոք իրավունք չունի գողանալ Վրաստանի եվրոպական ապագան»։

Ռադոսլավ Սիկորսկի, Լեհաստանի արտաքին գործերի նախարար. «Վրաստանի նախագահը հայտարարեց, որ խորհրդարանական ընտրությունները կեղծվել են։ Եվրոպան այժմ պետք է կանգնի վրաց ժողովրդի կողքին»։

Յան Լիպավսկի, Չեխիայի Հանրապետության արտաքին գործերի նախարար. «Չեխիան անհանգստացած է Վրաստանում ընթացող խորհրդարանական ընտրությունների մասին տեղեկություններով։ Մենք ուշադիր հետևում ենք երկրում տեղի ունեցող իրադարձություններին և կոչ ենք անում բոլոր կողմերին զերծ մնալ բռնություններից։ Վրաստանի իշխանությունները պետք է հարգեն ժողովրդավարական արժեքները և փոխեն գործողությունները, որոնք սպառնում են Վրաստանի եվրոպական ուղղությանը»։

Բենջամին Հադդադ, Ֆրանսիայի եվրոպական հարցերով նախարար-պատվիրակ. «Վրաստանում ընտրությունների դիտորդական առաքելությունների նախնական արդյունքները վկայում են ընտրողների նկատմամբ «ճնշումների, ահաբեկումների և սպառնալիքների մասին», ինչպես նաև «ժողովրդավարական հետընթացի»: ԵՄ թեկնածուի կարգավիճակը կապված է պարտականությունների հետ, ներառյալ ազատ ընտրությունները, հիմնարար ազատությունների պահպանումը և քաղաքական բազմակարծությունը: Պետք է հարգել նրանց վրաց ժողովրդի եվրոպական ուղին շարունակելու համար»։

Վրաստանի Կենտրոնական ընտրական հանձնաժողովի տվյալներով (հաշվարկվել է տեղամասերի 99,968%-ը), խորհրդարանական ընտրություններում «Վրացական երազանքը» հավաքել է ձայների 53,92%-ը, իսկ չորս ընդդիմադիր կուսակցությունները ընդհանուր՝ 37,786%։

ԿԸՀ-ի տվյալները կտրուկ տարբերվում են «Ֆորմուլա» և «Մթավարի» հեռուստաընկերությունների պատվերով անցկացված exit poll-ի ցուցանիշներից, որոնց համաձայն՝ ընդդիմությունն ընդհանուր առմամբ ավելի շատ պատգամավորական մանդատ է ստացել, քան «Վրացական երազանքը», սակայն դրանք համընկնում են իշխանական «Իմեդի» հեռուստաալիքի հրապարակած exit poll-ին։

Ընդդիմադիր կուսակցությունները և երկրի նախագահը չեն ճանաչում ընտրությունների պաշտոնական արդյունքների լեգիտիմությունը։ Սալոմե Զուրաբիշվիլին ասել է, որ ընտրություններն ամբողջությամբ կեղծված են, և անցկացվել է «ռուսական հատուկ գործողություն»։ Նա կոչ է արել Վրաստանի գործընկերներին Եվրոպայում և Ամերիկայի Միացյալ Նահանգներում լինել բնակչության կողքին։