ԵՄ-ն նախնական համաձայնություն է ձեռք բերել Մոլդովային 1,9 միլիարդ եվրոյի աջակցության վերաբերյալ

Եվրոպական խորհրդի կայքում հրապարակված տեղեկության համաձայն, հիմնադրամը գործիք է լինելու ԵՄ-ի հետ կապված բարեփոխումներին և Մոլդովայում տնտեսական աճին աջակցելու համար:

«Այս աջակցությունը մեզ թույլ կտա արագացնել բարեփոխումները, խթանել տնտեսությունը և ամրապնդել մեր երկրի դիմադրողականությունը աճող մարտահրավերների դիմաց: Շնորհակալ ենք մեր եվրոպացի գործընկերներին Մոլդովայի Հանրապետության և նրա քաղաքացիների կողքին լինելու համար»,- ասել է Մոլդովայի նախագահ Մայա Սանդուն։

1,9 միլիարդ եվրոն նախատեսված է 2025-2027 թվականների համար։ Ակնկալվում է, որ մոտ 385 միլիոնը կտրամադրվի դրամաշնորհների, իսկ 1,5 միլիարդը վարկերի տեսքով։ Եվրոպական խորհուրդը նշում է, որ վարկերը լինելու են շատ արտոնյալ՝ երկար մարման ժամկետներով և շահավետ տոկոսադրույքներով։

Ֆինանսական օգնությունը կտրամադրվի տարին երկու անգամ՝ Մոլդովայի կառավարության խնդրանքով և բարեփոխումների օրակարգով նախատեսված պայմանների կատարման հիման վրա։

«Մեր վճռականությունն է աջակցել Մոլդովային ԵՄ անդամակցության ճանապարհին, սա մեր պարտքն է այս անհանգիստ ժամանակներում: Այս փաթեթը կօգնի մոլդովացիներին իրականացնել հիմնական բարեփոխումները, ամրապնդել իրենց տնտեսությունը և ինտեգրվել ԵՄ միասնական շուկայում: Սա կնպաստի նաև Մոլդովայի դիմակայունությանը Ուկրաինայի դեմ Ռուսաստանի անարդարացի ագրեսիվ պատերազմի հետևանքներին արձագանքելու հարցում»,- ասել է Լեհաստանի եվրոպական հարցերով նախարար Ադամ Շլապկան։

Այժմ ձեռք բերված քաղաքական համաձայնությունը պետք է հաստատվի Եվրախորհրդարանի և Խորհրդի կողմից։

Ուկրաինան, Մոլդովան և Վրաստանը ԵՄ-ին անդամակցելու հայտ են ներկայացրել միաժամանակ՝ 2022 թվականի մարտին՝ Ուկրաինա Ռուսաստանի լայնամասշտաբ ներխուժումից անմիջապես հետո։ Նույն թվականի հունիսին Ուկրաինան և Մոլդովան ստացան թեկնածուի կարգավիճակ, իսկ երկու տարի անց սկսեցին անդամակցության բանակցությունները։