Լրահոս

Սա Արդարություն և զարգացում կուսակցության ամենածանր պարտությունն է վերջին երկու տասնամյակների ընթացքում։ Կուսակցության ղեկավար և երկրի նախագահ Ռեջեփ Թայիփ Էրդողանը հայտարարել է, որ ընտրությունների արդյունքները շրջադարձային են, ոչ թե ավարտական։

«Նախ ընտրական մարաթոնի հաղթողը ոչ թե թեկնածուներն են, այլ Թուրքիան՝ երկրի 85 միլիոն քաղաքացին՝ անկախ քաղաքական պատկանելությունից։ Ցավոք, մայիսի 28-ի ընտրություններում մեր հաղթանակից 9 ամիս անց մենք չստացանք այն արդյունքները, որոնք ցանկանում էինք տեղական ընտրությունների թեստում»,- ասել է Էրդողանը, ով 1994 թվականին ընտրվել է Ստամբուլի քաղաքապետ։

Կիրակի օրը քվեարկության ավարտից հետո Ժողովրդահանրապետական ​​կուսակցությունից Ստամբուլի նորընտիր քաղաքապետ Էքրեմ Իմամօղլուն հայտարարել է, որ ավելի քան մեկ միլիոն ձայնով հաղթել է իշխող կուսակցության թեկնածուին։ Արդյունքների համաձայն՝ նա ստացել է ձայների 51 տոկոսը։

«Նրանք, ովքեր չեն լսում ազգի ուղերձը, ի վերջո կպարտվեն։ Այս գիշեր Ստամբուլի 16 միլիոն քաղաքացիներ ուղերձ են հղել թե՛ մեր մրցակիցներին, թե՛ նախագահին»,- ասել է նախկին գործարար Իմամօղլուն՝ ելույթ ունենալով հազարավոր աջակիցների առջև։ Նա քաղաքականությամբ է զբաղվում 2008 թվականից և համարվում է հաջորդ նախագահական ընտրությունների գլխավոր ընդդիմադիր թեկնածուներից մեկը։

Մայրաքաղաք Անկարայում հաղթել է գործող քաղաքապետ, Ժողովրդահանրապետական ​​կուսակցության անդամ Մանսուր Յավաշը (60,35%), իսկ Իզմիրում՝ նույն կուսակցության թեկնածու Քեմիլ Տուգայը (48,90%)։

Մարտի 31-ի ընտրություններում գրանցվել է ավելի քան 61 մլն ընտրող։ Երկրում բացվել է 206 845 ընտրատեղամաս։ Ընտրողների մասնակցությունը կազմել է 78,53%:

«Անադոլու» պետական ​​լրատվական գործակալության փոխանցմամբ՝ Ժողովրդահանրապետական կուսակցությունը հաղթել է 81 նահանգներից 36-ում։