Էստոնիան նույնպես վիզային պատժամիջոցներ է սահմանել Իվանիշվիլիի և ՆԳՆ բարձրաստիճան պաշտոնյաների նկատմամբ

Ըստ ԱԳ նախարար Մարգուս Ցահկնայի՝ նշված անձանց արգելվել է մուտք գործել Էստոնիա՝ Վրաստանում օրինական բողոքի ակցիաները ագրեսիվ ճնշելու միջոցով մարդու իրավունքների լուրջ ոտնահարմանը մասնակցելու պատճառով։

«Վրաց ժողովուրդը պետք է կարողանա պաշտպանել իր իրավունքները, քանի որ իշխող կուսակցությունը երկար ժամանակ սիստեմատիկորեն ստում է վրացիներին, և մարդիկ իրավունք ունեն իրենց զգացմունքներն արտահայտելու բողոքի միջոցով։ Հանրահավաքի մասնակիցների նկատմամբ բռնությունը անհամաչափ է և մարդու իրավունքների դեմ»,- ասել է Մարգուս Ցահկնան։

Էստոնիայի արտաքին գործերի նախարարության կայքում հրապարակված հայտարարության մեջ ասվում է, որ Բիձինա Իվանիշվիլին համարվում է Վրաստանի կառավարության քաղաքականության ճարտարապետը և, հետևաբար, պատասխանատու է երկրում արևմտամետ մարդկանց ճնշումների համար։

Էստոնիայի կողմից պատժամիջոցների ենթարկված Վրաստանի ՆԳՆ այլ բարձրաստիճան պաշտոնյաների թվում են ներքին գործերի փոխնախարարներ Շալվա Բեդոիձեն, Իոսեբ Չելիձեն, Ալեքսանդր Դարախվելիձեն և Գիորգի Բուտխուզին, ՆԳՆ հատուկ հանձնարարությունների վարչության տնօրեն Զվիադ Խարազիշվիլին և նրա տեղակալները՝ Միլեր Լագազաուրին և Միրզա Կեզևաձեն, Պարեկային ոստիկանության վարչության տնօրեն Վաժա Սիրաձեն, Քրեական ոստիկանության վարչության տնօրեն Թեյմուրազ Կուպատաձեն։

Նշված անձանց նկատմամբ վիզային սահմանափակումներ են սահմանել նաև Լիտվան և Լատվիան։