Եթե ​​ռուսական օրենքը գործարկվի և ընտրություններն ազատ չլինեն, մենք միջոցներ կձեռնարկենք․ Կարպենտեր

Այս մասին Կարպենտերը հայտարարել է Վարշավայի անվտանգության ֆորումում՝ ի պատասխան պատգամավոր, «Միասնություն-Ազգային շարժում» կուսակցության անդամ Խատիա Դեկանոիձեի հարցին։ Դեկանոիձեն հարցրել է նրան, թե արդյո՞ք Բայդենի վարչակազմը դիտարկում է «ակտիվ միջոցներ» ընտրություններից առաջ ընդդեմ Բիձինա Իվանիշվիլիի, «ով իսկապես գողանում է վրաց ժողովրդի կամքը»։

«Այն, ինչ հիմա անում է «Վրացական երազանքի» կառավարությունը, Վրաստանը 180 աստիճանով հեռացնում է եվրատլանտյան ինտեգրումից։

Եթե ​​նրանք շարունակեն քաղաքացիական հասարակությունը խարխլելու, հիմնարար ազատությունները ոտնահարելու, «օտարերկրյա գործակալների» օրենքների կիրառման իրենց ճանապարհը, և եթե ընտրություններն ազատ ու արդար չլինեն, նրանք շուտ չեն մտնի ՆԱՏՕ կամ ԵՄ, և մենք կշարունակենք այնպիսի միջոցներ ձեռնարկել, ինչպիսին մեր վիզային քաղաքականությունն է և գլոբալ Մագնիտսկիի պատժամիջոցները, որոնք ենթադրում են հետևանքների այն մարդկանց համար, ովքեր խախտում են ժողովրդավարական նորմերը:

Չի կարող այդքան մեծ անջրպետ լինել վրաց ժողովրդի՝ եվրատլանտյան ապագայի ձգտումների և այն ամենի միջև, ինչ անում է կառավարությունը։ Ես ուզում եմ միանգամայն հստակ ասել՝ այն, ինչ մենք տեսնում ենք տեղում, անընդունելի է»,- ասել է Կարպենտերը։

Այն բանից հետո, երբ մայիսի վերջին Վրաստանի իշխող կուսակցությունն ընդունեց քաղաքացիական հասարակությունն ու անկախ լրատվամիջոցները սահմանափակող  այսպես կոչված «գործակալների» մասին ռուսական օրենքը, դադարեցվեց Վրաստանի ԵՄ անդամակցության գործընթացը, և ԱՄՆ-ը սկսեց Վրաստանի հետ համագործակցության «համապարփակ վերանայում»։

Միացյալ Նահանգները վիզային պատժամիջոցներ է սահմանել Վրաստանի ավելի քան 90 քաղաքացիների նկատմամբ, այդ թվում՝ օրենսդիրների, ովքեր սատարում են ռուսական օրենքը և այն մարդկանց, ովքեր ներգրավված են ապատեղեկատվության տարածման մեջ։ Բացի այդ, գանձապետարանը պատժամիջոցներ է սահմանել և «Մագնիտսկու ցուցակում» է ներառել երկու ներկայիս բարձրաստիճան պետական ​​պաշտոնյաների, ինչպես նաև ռուսամետ Alt-Info խմբավորման երկու առաջնորդների: «Ամերիկայի Ձայնի» տեղեկություններով՝ ԱՄՆ-ը պատժամիջոցներ է մշակել «Վրացական երազանքի» պատվավոր նախագահ և Վրաստանի նախկին վարչապետ Բիձինա Իվանիշվիլիի դեմ։