Եվրահանձնաժողովը պահանջում է վիզային սահմանափակումներ մտցնել վրացի դիվանագետների համար

«Վրացի ժողովուրդը բողոքում է Եվրամիության ուղին կանգնեցնելու կառավարության որոշման դեմ։ Բողոքի խաղաղ ցույցերին հաջորդեցին ոստիկանական բռնությունները։ Այսօր մենք կներկայացնենք վրացի դիվանագետների համար վիզային ռեժիմի սահմանափակումների առաջարկ։

Մեր ուղերձը ղեկավարությանը հստակ է՝ դադարեցրեք վնասել սեփական ժողովրդին»,- գրել է Եվրահանձնաժողովի նախագահ Ուրսուլա ֆոն դեր Լեյենը հարթակ X-ում։

Եվրահանձնաժողովի տարածած հայտարարության մեջ ասվում է, որ եթե համաձայնագիրը կասեցվի, վիզային արտոնությունները, ինչպիսիք են դիմումների մշակման ավելի կարճ ժամկետները, վիզայի ցածր վճարները և օժանդակ փաստաթղթերի ավելի քիչ պահանջները, նույնպես այլևս չեն կիրառվի դիվանագիտական ​​և ծառայողական անձնագրեր ունեցողների վրա:

Եվրահանձնաժողովը նշում է, որ այս առաջարկը պատասխան է նոյեմբերի 28-ից ի վեր Վրաստանի իշխանությունների կողմից խաղաղ ցուցարարների, քաղաքական գործիչների և անկախ լրատվամիջոցների նկատմամբ իրականացվող դաժան բռնաճնշումների։

Բացի այդ, Եվրահանձնաժողովը քննադատում է մայիսին և սեպտեմբերին «Վրացական երազանքի» կողմից ընդունված օրենքները, որոնք «խաթարում են հիմնարար իրավունքները»։ Խոսքն այսպես կոչված «օտարերկրյա գործակալների» մասին ռուսական օրենքի և «Ընտանեկան արժեքների և անչափահասների պաշտպանության մասին» օրենքի մասին է:

«Հիմնական իրավունքների պաշտպանությունը, ինչպիսին է խտրականության դեմ քաղաքականության արդյունավետ իրականացումը, վիզայի ազատականացման համար վճռորոշ պահանջ է», - բացատրում է Եվրահանձնաժողովը:

Հանձնաժողովի փոխնախագահ Կայա Կալասը նշել է, որ Վրաստանի նկատմամբ պատժամիջոցները նույնպես սեղանին են, և լրացուցիչ միջոցների շուրջ քննարկումները կշարունակվեն։

«Այսօր մենք միջոցներ ենք ձեռնարկում Վրաստանի իշխանություններին պատասխանատվության ենթարկելու խաղաղ ցույցերը դաժանորեն ճնշելու համար։

Սա հստակ ուղերձ է հղում վրացական իշխանություններին, որ նրանք չեն կարող ճնշել ընդդիմության ձայները կամ սահմանափակել խոսքի ազատությունը առանց հետևանքների։

Մենք արդեն կրճատել ենք քաղաքական շփումները և կառավարության կողմից ֆինանսավորումը ուղղել վրաց ժողովրդին, քաղաքացիական հասարակությանը և անկախ լրատվամիջոցներին: Մենք կշարունակենք աջակցել վրաց ժողովրդին դեպի Եվրամիություն նրա ճանապարհին»,- ասել է Կալասը։

Ժողովրդավարության եվրոպական հանձնաժողովի գործադիր փոխնախագահ Հենա Վիրկունենը նույնպես մեկնաբանություն է արել․

«Այսօրվա առաջարկը Եվրամիության խիստ արձագանքն է Վրաստանի կառավարության լուրջ ժողովրդավարական հետընթացին։ Վիզաների ազատականացումը առանցքային է ԵՄ-ի և գործընկեր երկրների միջև շարժունությունը հեշտացնելու համար: Նրանք, ովքեր չեն պաշտպանում հիմնարար իրավունքները, չպետք է օգտվեն այս ազատությունից: Եվրամիությունը կանգնած է վրաց ժողովրդի կողքին»:

Եվրամիության և Վրաստանի միջև վիզային ռեժիմի դյուրացման մասին համաձայնագիրը ուժի մեջ է մտել 2011 թվականի մարտին, իսկ 2017 թվականի մարտից Վրաստանի քաղաքացիներն օգտվում են ԵՄ/Շենգենյան գոտու անդամ երկրներ առանց վիզայի ճանապարհորդելու իրավունքից։