Եվրոպական միությունը կոչ է անում անհապաղ ազատ արձակել Մզիա Ամաղլոբելիին

«Եվրոպական միությունն իր համերաշխությունն է հայտնում Մզիա Ամաղլոբելիին՝ հացադուլի 17-րդ օրը և կոչ է անում անհապաղ ազատ արձակել նրան։ Ազատ մամուլը և արդար դատաքննության իրավունքը Եվրոպական միության արժեքների հիմքում են»,- ասվում է ԵՄ պատվիրակության տարածած հայտարարության մեջ։

Այսօր՝ հունվարի 28-ին, Վրաստանում ԵՄ դեսպան Պավել Հերչինսկին և ԵՄ անդամ երկրների դեսպանները հանդիպել են Batumelebi-ի և Netgazeti-ի գլխավոր խմբագիրներ Էթեր Թուրաձեի և Նեստան Ցեցխլաձեի հետ։

Գերմանիայի դեսպան Պիտեր Ֆիշերը հանդիպումից հետո հարթակ X-ում գրել է, որ Մզիա Ամաղլոբելիի գործը «շատ վատ է»։

«Առաջադրված մեղադրանքը և նրա խափանման միջոցը չափազանցված և անհիմն են թվում։ Մենք բոլորս տեսել ենք ապտակի տեսանյութը։ Ո՞ւր է մարդկությունը»,- գրել է Գերմանիայի դեսպանը։

Վրաստանում Էստոնիայի դեսպան Մարջ Մարդիսալու-Կահարման կոչ է արել անհապաղ ազատ արձակել Մզիա Ամաղլոբելիին: Նա X-ում գրում է, որ «Վրաստանում սև օրեր են ազատ լրատվամիջոցների համար»։

«Բաթումելեբի» և «Նեթգազեթի» առցանց լրատվամիջոցների հիմնադիր Մզիա Ամաղլոբելին մեղադրվում է Բաթումիի ոստիկանության պետ Իրակլի Դգեբուաձեի վրա հարձակվելու մեջ և նրան սպառնում է 4-ից 7 տարվա ազատազրկում։ Իրավապաշտպանները պնդում են, որ քրեական հետապնդումն անօրինական է և իրենից ներկայացնում է ահաբեկում և քաղաքական ռեպրեսիա, քանի որ լրագրողի արարքը՝ երեսին ապտակելը, չի կարող որակվել որպես հարձակում ոստիկանի վրա։ Նրանք դատախազությանը կոչ են անում անհապաղ դիմել դատարան և միջնորդել փոխել խափանման միջոցը՝ կալանքը։

Մզիա Ամաղլոբելին արդեն 17 օր է՝ ի նշան բողոքի բանտում հացադուլ է անում։ Նա մի քանի խրոնիկ հիվանդություններ ունի, և բժիշկները մտավախություն ունեն, որ նրա կյանքին վտանգ է սպառնում։