Գախարիայի վրա օդանավակայանում ձվեր են նետել. կուսակցության հայտարարությամբ՝ միջադեպի հեղինակը «Երազանքն» է

«Գիորգի Գախարիային և մեր թիմակից, Գերմանիայում նախկին դեսպան Էլգուջա Խոկրիշվիլիին Թբիլիսիի միջազգային օդանավակայանում դիմավորել է Իվանիշվիլիի նախապես կազմակերպված, նախապես պատրաստված կուսակցական խմբավորումը, որոնց օգնել է տեղում ներկա ոստիկանների բացարձակ անգործությունը, որոնք նույնպես նախապես զգուշացվել են այսօր առավոտյան»,- ասված է կուսակցության հայտարարության մեջ, որը տարածվել է այսօր՝ փետրվարի 17-ի առավոտյան։

Միջադեպը ներկայացնող տեսանյութում, որը տարածվել է սոցցանցերում, այդ թվում՝ կառավարական քարոզչական POS TV-ի կողմից, Գիորգի Գախարիայի հասցեին հնչում է՝ «գումարը փոխանցե՞լ են», «ի՞նչ հանձնարարականներ ես ստացել», «USAID-ն այլևս չի ֆինանսավորում և որոշել եք Եվրոպայի՞ց մուրալ», «վաճառող» և հայհոյանքներ։

Կուսակցության անդամները կարծում են, որ միջադեպը կապված է Գիորգի Գախարիայի՝ Մյունխենի համաժողովին մասնակցելու հետ։

«Իվանիշվիլին վախեցած է Մյունխենի անվտանգության համաժողովի արդյունքներից, և այդ հիստերիան հենց դրանից է առաջացել»,- ասել են կուսակցությունից։

«Վրացական երազանքի» կառավարության ներկայացուցիչներն այս տարի չեն հրավիրվել Մյունխենի անվտանգության համաժողովին՝ միջազգային անվտանգության հարցերով աշխարհի առաջատար ֆորումներից մեկին։

Միջոցառմանը ներկա են եղել Վրաստանի հինգերորդ նախագահ Սալոմե Զուրաբիշվիլին և նախկին վարչապետ Գիորգի Գախարիան։ Համաժողովի շրջանակներում Գախարիան հանդիպել է Եվրոպայի խորհրդի գլխավոր քարտուղար Ալեն Բերսեի և Եվրամիության մի շարք երկրների արտգործնախարարների հետ։

Մեկ ամիս առաջ՝ փետրվարի 15-ին, Գիորգի Գախարիայի վրա հարձակվել էին ոչ լեգիտիմ պատգամավոր Դիմիտրի Սամխարաձեն և մի քանի այլ անձինք։ Բաթումիի «Շերատոն» հյուրանոցում ծեծի ենթարկվելուց հետո նրա մոտ ախտորոշվել է քթի ոսկորի կոտրվածք և ուղեղի ցնցում: Ոստիկանությունը քրեական գործ է հարուցել բռնության հոդվածով, սակայն մինչ օրս ոչ ոք պատասխանատվության չի ենթարկվել։ Գախարիայի խոսքով՝ սա քաղաքական հաշվեհարդար էր, որի հեղինակն ու պատվիրատուն Բիձինա Իվանիշվիլին էր։