«Գիրչիի» քահանայի վկայականներով երիտասարդներն այլևս չեն կարողանա խուսափել բանակից

«Կարծում եմ, հավանաբար, երկրում չի գտնվի հայրենասեր մարդ, ով չանհանգստանա, չմտածի ու չնյարդայնանա այս հարցով։ Փաստորեն, երիտասարդներին շփոթեցնում էին և այլընտրանքային աշխատանք առաջարկում։ Մենք շատ լավ գիտենք, որ դա կեղծ, իբր ինչ-որ կրոնական ծառայություն էր։ Ինչպե՞ս կարելի է: Սա նողկալիություն է, ես ուղղակիորեն սա այսպես եմ նշում։ Մենք չենք կարող աչք փակել սրա վրա։ Մեր պարտքն է լուծել այս հարցը, և մենք այն լուծելու ենք։ Հիմա կասեմ ինչպես: Այսպիսով՝ կվերացվի օրենսդրական այս բացը, որը պարոն Զուրաբ Ջափարիձեն [«Գիրչի» կուսակցության նախկին առաջնորդ], մեծ պատիվ է նրա անունը նշել կառավարության նիստից, բայց կասեմ, որ սա ամենամեծ վնասն էր, որ նա հասցրեց երկրի երիտասարդությանը, մեր ապագա սերնդին։ Հետևաբար, այն կփակվի, կվերացվի այս բացթողումը և կբացառվի նրանց անազնիվ, շինծու, այսպես կոչված, կրոնական կազմակերպությունների հնարավորությունը։

Այս հարցը մենք քննարկել ենք պատրիարքարանի հետ և, ըստ համապատասխան արձանագրության, հիշյալ հարցը վերջնականապես կլուծվի։ Մենք այլևս թույլ չենք տա այս վնասատուներին մոլորեցնել մեր երիտասարդ, առողջ սերնդին։ Մարդուն ուղղակիորեն ասում էին՝ խուսափեք ձեր գլխավոր սահմանադրական պարտականությունից։ Ի՞նչը կարող է ավելի մեծ վնաս և թշնամություն լինել երկրի համար: Այնպես որ, այս հարցը լուծված է»,- ասել է վարչապետը։

Կառավարության ղեկավարի խոսքով՝ Պաշտպանության նախարարության կողմից մշակված պաշտպանության օրենսգիրքը նախատեսում է պարտադիր զինվորական ծառայության բարեփոխում։ Մասնավորապես.

Քաղաքացիները պարտադիր զինվորական ծառայություն կանցնեն միայն Պաշտպանության նախարարությունում: Այն լինելու է ինտենսիվ մարտական-զինվորական պատրաստության ծրագիր, որի տևողությունը կլինի 6, 8 կամ 11 ամիս։ Բացի այդ, մինչև 23 տարեկան ուսանողները, որոնք կորոշեն պարտադիր զինվորական ծառայությունն անցնել ուսանողական տարիներին, չորս տարի շարունակ ռազմաբազայում տարեկան մոտ մեկ ամիս կմասնակցեն ինտենսիվ պատրաստման ծրագրի:

Իրակլի Ղարիբաշվիլիի խոսքով, չորս տարի անց նրանց կտրվի շարքայինի կոչում և կհամարվի, որ նրանք անցել են պարտադիր զինվորական ծառայությունը։

«Կարծում եմ, որ շատ կարևոր որոշում է՝ մի կողմից կարգավորել և լուծել ենք այս բացթողումը, մյուս կողմից՝ շատ արդյունավետ ծրագիր կլինի, կբարձրացնի բանակի հանրաճանաչությունը, երիտասարդների շրջանում կբարձրանա հայրենասիրական, ռազմական ոգին, նրանք կվարժվեն այլ հմտությունների, զինվորական կարգապահության, և կարծում եմ, որ շատ հաջող բարեփոխում կլինի։ Ամենակարևորը՝ կարելի է ասել, որ տասը տարի հետո, այս ծրագրի ամբողջական իրականացումից հետո (գուցե նաև մինչ այդ), երկիրը կունենա առնվազն 100 հազար պահեստային»,- նշել է Ղարիբաշվիլին։

«Գիրչի» կուսակցությունը հայտարարությամբ է արձագանքել վարչապետի նախաձեռնությանը և կոչ արել «Բիբլիական ազատության» քահանայի վկայականից օգտված տասնյակ հազարավոր երիտասարդներին բացահայտ արտահայտել իրենց դիրքորոշումը և պաշտպանել ձեռք բերած ազատությունը.

«Մենք տարիներ շարունակ պայքարում ենք ստրկության դեմ։ Ստրկությունը վիրավորանք է մարդու արժանապատվությանը։ Հարկադիր զինվորական ծառայությունը (պարտադիր զորակոչը) ստրկություն է: Բանակում պետք է ծառայեն այն մարդիկ, ովքեր ցանկանում են երկրի պաշտպանությունը դարձնել մասնագիտություն: Իսկ մասնագիտությունը գնահատվում է, երբ այն կամավոր է ու բարձր վարձատրվող։ Մեր գրասենյակ եկած մեծ թվով մարդիկ ստորագրում են զորակոչը վերացնելու խնդրագիր։ Մենք կուտակել ենք 7000-ից ավելի նման խնդրագիր։ Վարչապետի այսօրվա հայտարարության էությունն այն է, որ կառավարությունը չի ցանկանում մարդկանց աշխատավարձ տալ և ուզում է ստիպել նրանց աշխատել որպես զինվոր։ Դա ոչ մի կապ չունի ոչ հայրենասիրության, ոչ քրիստոնեության, ոչ էլ ինքնապաշտպանական կարողությունների հզորացման հետ»:

«Գիրչի» կուսակցությունը «Վրաստանի քրիստոնեական, ավետարանական, բողոքական եկեղեցի – Բիբլիական ազատություն» կրոնական կազմակերպությունը հիմնել է 2017 թվականին։ Կազմակերպության նպատակն է օգնել 18-ից 27 տարեկան երիտասարդներին ազատվել մեկ տարվա պարտադիր զինվորական ծառայությունից, որի համար ժամկետային զինծառայողներին տալիս է քահանայի վկայական։ Վրաստանի օրենսդրությունը ցանկացած դավանանքի քահանաներին ազատում է զինվորական ծառայությունից։

6 ամիս ժամկետով տրվող «քահանայի վկայականն» արժե 50 լարի, մինչդեռ մեկ տարով պարտադիր զինվորական ծառայությունը հետաձգելու համար պետության կողմից սահմանված տուրքը 2000 լարի է։

«Բիբլիական ազատության» քահանայի վկայականից օգտվել է մոտ 50 հազար երիտասարդ։ «Գիրչին» պնդում է, որ իրենց սկսած նախագիծը փաստացի չեղարկել է պարտադիր զինվորական զորակոչը։