Լրահոս

«Ես պետք է ամենադժվար որոշումը կայացնեմ՝ հաշվի առնելով բժիշկների խորհուրդները։ Բուժման գործընթացը հավանաբար կտևի մի քանի ամիս, և ես մեկ շաբաթից ավելի է, ինչ արտերկրում եմ այդ նպատակով։ Ուստի, հաշվի առնելով ստեղծված իրավիճակը, ինձ համար անհնար է շարունակել գլխավոր դատախազի լիազորությունների իրականացումը։ Այդ իսկ պատճառով ես արդեն դիմել եմ Վրաստանի խորհրդարանին՝ հրաժարականի մասին դիմումով»,- ասում է Իրակլի Շոթաձեն։ Նրա հայտարարությունը տարածել է Գլխավոր դատախազությունը։

Նախկին վարչապետ Գիորգի Գախարիայի «Հանուն Վրաստանի» կուսակցության առաջնորդներից Նաթիա Մեզվրիշվիլին կարծում է, որ Շոթաձեի հրաժարականը Բիձինա Իվանիշվիլիի ծրագրի մի մասն է։

«Գլխավոր դատախազը հրաժարական է տվել։ Իվանիշվիլիի միանգամայն սպասված որոշումը (ես դա վաղուց էի ասում)։ Ընտրություններից անմիջապես հետո լրանում է գլխավոր դատախազի լիազորությունների ժամկետը։ Իվանիշվիլին պատրաստվում է պարտության, և նրա համար կարևոր է ընտրություններից հետո ապահովագրված լինել դատախազությունից ու դատարանից։ Ուստի ընտրություններից առաջ պետք է ընտրվի նոր հավատարիմ գլխավոր դատախազ՝ 6 տարի ժամկետով»,- սոցցանցում գրել է Նաթիա Մեզվրիշվիլին, ով տարբեր ժամանակներում բարձր պաշտոններում է աշխատել դատախազությունում և ներքին գործերի նախարարությունում։

Վրաստանի խորհրդարանը Իրակլի Շոթաձեին 6 տարի ժամկետով գլխավոր դատախազ է ընտրել 2020 թվականի փետրվարի 18-ին։ 2015-2018 թվականներին Շոթաձեն զբաղեցրել է գլխավոր դատախազի, իսկ 2013-2015 թվականներին՝ գլխավոր դատախազի առաջին տեղակալի պաշտոնները։

Գլխավոր դատախազի լիազորությունների վաղաժամկետ դադարեցման դեպքում դատախազության խորհուրդն անհապաղ մեկամսյա խորհրդակցություններ է սկսում ակադեմիական շրջանակների, քաղաքացիական հասարակության ներկայացուցիչների և իրավունքի ոլորտի մասնագետների հետ՝ գլխավոր դատախազի թեկնածուներ ընտրելու համար։ Խորհրդակցությունների արդյունքում դատախազության խորհուրդը կընտրի գլխավոր դատախազության առնվազն 3 թեկնածուի և գաղտնի կքվեարկի նրանց օգտին։ Դատախազական խորհուրդը համապատասխան հիմնավորումներով խորհրդարանին է ներկայացնելու ընտրված մեկ թեկնածուի։ Գլխավոր դատախազին ընտրելու համար անհրաժեշտ է խորհրդարանի ամբողջական կազմի մեծամասնության (76 պատգամավոր) աջակցությունը։ Նույն մարդը երկու անգամ անընդմեջ չի կարող ընտրվել գլխավոր դատախազ։