Հակակոռուպցիոն բյուրոն ընդդիմադիր կուսակցություններին մեղադրում է թափանցիկ չլինելու մեջ

«Հակակոռուպցիոն բյուրոյի կողմից իրականացված մոնիտորինգի արդյունքում պարզվել է, որ քաղաքական կուսակցությունները, մասնավորապես՝ «Եվրոպական Վրաստան՝ շարժում հանուն ազատության», «Այո Եվրոպային՝ Ստրատեգիա Աղմաշենեբելի», «Ազգային շարժում», «Գիրչի՝ ավելի շատ ազատություն», «Ուժեղ Վրաստան՝ Լելո, Հանուն ժողովրդի, Հանուն ազատության», «Էլենե Խոշտարիա՝ Դրոա» և «Նոր միասնություն – Գվարամիա, Մելիա», իրենց ֆինանսավորման մասին մասամբ կամ լրիվ տեղեկություն չեն հրապարակում։ Միևնույն ժամանակ, նրանց նախընտրական արշավներն ու գործունեությունը կարող են ֆինանսավորվել օտարերկրյա դոնոր կազմակերպությունների կամ այլ աղբյուրների կողմից, որոնք իրենց հերթին գումար են վճարում այդ քաղաքական կուսակցությունների հետ փոխկապակցված հասարակական կազմակերպություններին: Ըստ նշված սխեմայի՝ քաղաքական կուսակցություններին և գործընթացներին օտարերկրյա փողերով աջակցությունը սպառնալիք է արդար ընտրական գործընթացի համար»,- ասել է վարչապետի կողմից հակակոռուպցիոն բյուրոյի նախագահ նշանակված Ռաժդեն Կուպրաշվիլին։

Կուպրաշվիլին ասել է, որ «Ազատության հրապարակ» շարժմանը, «Բազմակուսակցական ժողովրդավարության արևելյան Եվրոպայի կենտրոնին», այդ կազմակերպությունների նախագահ Լևան Ցուցքիրիձեին և շարժման 24 անդամներին հանձնարարել է ներկայացնել ֆինանսական հաշվետվություններ, քանի որ նրանք բացահայտ քաղաքական ուղերձներ են հնչեցրել։

Հակակոռուպցիոն բյուրոյի ղեկավարն արձագանքել է նաև երկրում անցկացվող «Ժողովրդավարության փառատոնին» և ասել, որ փառատոնին հրավիրված է եղել քաղաքական կուսակցությունների և հասարակական կազմակերպությունների միայն որոշակի հատված։

«Ժողովրդավարական փառատոնը» կազմակերպվում է «Բազմակուսակցական ժողովրդավարության արևելյան Եվրոպայի կենտրոնի» կողմից և «Կուսակցությունների և ժողովրդավարության դանիական ինստիտուտի» աջակցությամբ։ Գործով ձեռք բերված ապացույցների հիման վրա հիմքեր ունենք ենթադրելու, որ հիշյալ փառատոնն իր բնույթով քաղաքական է և ուղղված է կոնկրետ մասնակից քաղաքական կուսակցություններին աջակցելուն։ «Փառատոնին» հրավիրված էին քաղաքական կուսակցությունների միայն մի մասը, և ոչ բոլոր կուսակցություններն էին հնարավորություն ունեցել մասնակցելու։ «Փառատոնին» մասնակցում էին միայն այն հասարակական կազմակերպությունները, որոնց գործունեությունն ուղղված է կոնկրետ քաղաքական կուսակցություններին աջակցելուն կամ զերծ մնալուն։ Այս գործով ապացույցներ ձեռք բերելու գործընթացը շարունակվում է, իսկ ամփոփ որոշումը հայտնի կդառնա հանրությանը»,- ասել է Կուպրաշվիլին։

Ինչպես հայտնի է, «Ժողովրդավարության փառատոնն» անցկացվել է Ծալենջիխայում, Թելավիում և Քութայիսիում, սակայն Բաթումիում կազմակերպիչները չեղարկել են այն։ «Վրացական երազանքը» հայտարարել է, որ փառատոնի ֆինանսավորման թեման հարցեր է առաջացնում, և օտարերկրյա երկրների միջամտությունը նախընտրական արշավին անթույլատրելի է։

Հակակոռուպցիոն բյուրոյի ղեկավար Կուպրաշվիլին IRI-ին և NDI-ին կոչ է անում դրամաշնորհների մասին տեղեկություն հրապարակել։

«Ներկայիս ընտրական գործընթացում միջազգային դիտորդական կազմակերպությունների գործունեությունը մեծ նշանակություն ունի, ուստի մենք դիմում ենք բոլոր կազմակերպություններին, այդ թվում՝ NDI-ին (National Democratic Institute) և IRI-ին (International Republican Institute), որոնք պետք է ընտրություններին ներկայացնեն օբյեկտիվ դիտորդներ։ Ապահովել, որ ձեր կողմից տրված դրամաշնորհների թափանցիկությունը երաշխավորվի այնպես, որ ֆինանսավորվող միջոցառումները չօգտագործվեն քաղաքական կուսակցություններին աջակցելու համար: Չեզոքությունն ու օբյեկտիվությունը վճռորոշ նշանակություն ունեն ընտրությունների մոնիտորինգ իրականացնող կազմակերպությունների համար»,- ասել է Կուպրաշվիլին։

Հակակոռուպցիոն բյուրոյի ղեկավարը ոչինչ չի ասել իշխող կուսակցության գործունեության մասին։